جاڭالىقتار
مينيسترلىك قازاقستاندا كۇزدە جانارماي تاپشىلىعى بولۋى مۇمكىن ەكەنىن ەسكەرتتى
فوتو: freepik.com
قازاقستاندا جانارماي باعاسىنىڭ ءوسۋى جالعاسۋدا, ۇكىمەت بۇل شەگى ەمەس ەكەنىن, باعا كۇزدە ودان ءارى ءوسۋى مۇمكىن ەكەنىن مالىمدەدى, دەپ جازدى qandastar.kz
بۇل تۋرالى Stan.kz اقپارات اگەنتتىگى «جەتىنشى ارناعا» سىلتەمە جاساپ حابارلايدى.
تەلەارنانىڭ حابارلاۋىنشا, بەنزين مەن ديزەل وتىنىنىڭ ەڭ ءتيىمدى باعاسى ەلىمىزدىڭ باتىسى مەن وڭتۇستىگىندە – اتىراۋدا 92-ءنى ليترىنە 204 تەڭگەدەن, شىمكەنت پەن اقتوبەدە ليترىنە 207-210 تەڭگەدەن قۇيۋعا بولادى. ەلوردالىق جانارماي قۇيۋ بەكەتتەرىندە اي-92 ماركالى بەنزيننىڭ ءليترى 222 تەڭگەگە دەيىن كوتەرىلىپ ۇلگەردى. مەملەكەتتىك رەتتەۋ الىپ تاستالعالى بەرى جانارماي 17 تەڭگەگە قىمباتتادى.
سونىمەن قاتار ديزەل وتىنىنىڭ باعاسى الماتى, شىمكەنت جانە استانادا جوعارى بولىپ تۇر – ليترىنە 315-319 تەڭگە.
بۇل رەتتە ۇلتتىق ستاتيستيكا بيۋروسى بەنزين باعاسىنىڭ كوتەرىلۋى ەڭ قاجەت تاۋارلاردىڭ قۇنىنا قالاي اسەر ەتكەنىن ايتا الماي وتىر. مەملەكەتتىك مەكەمە مۇنداي ەسەپتەۋلەر جۇرگىزىلمەيتىنىن حابارلادى. دەگەنمەن سيۋجەتتە تاكسي قىزمەتى مەن ازىق-ت ۇلىك باعاسىنىڭ ءوسۋى قازىردىڭ وزىندە قازاقستاندىقتاردىڭ قالتاسىنا اۋىر ءتيىپ جاتقانى ايتىلعان.
بيۋرو مالىمەتىنشە, وسى جىلدىڭ 7 ايىندا ەلدەگى ورتاشا ينفلياتسيا 7,7 پايىز بولدى.
«اقىلى قىزمەت كورسەتۋ باعاسى 9,2 پايىز, ونىڭ ىشىندە تاكسي باعاسى 11,1 پايىز, ازىق-ت ۇلىك تاۋارلارىنىڭ باعاسى 8,4 پايىز, كارتوپ باعاسى 39,7 پايىز, جاڭا پىسكەن جەمىستەر باعاسى 22,1 پايىز, ەت باعاسى 11,9 پايىز وستى. ازىق-ت ۇلىك ەمەس تاۋارلاردىڭ باعاسى 5,3 پايىز وستى. باللونداعى سۇيىتىلعان گاز – 14,5 پايىز, ديزەلدىك وتىن – 5,9 پايىز, بەنزين – 4,9 پايىز», – دەدى بيۋرونىڭ باس ساراپشىسى سىرىم قۇسايىن
مۇناي سالاسىنىڭ ساراپشىلارى ارزان ەنەرگيا تاسىمالداۋشى ءداۋىرى اياقتالدى, ەندى باعا تەك وسەدى دەپ ەسەپتەيدى. مامانداردىڭ ايتۋىنشا, وتاندىق تاۋار وندىرۋشىلەر ءوز ءونىمىنىڭ قۇنىن وتەمەي, شىعىنمەن جۇمىس ىستەپ جاتىر.
«بۇل ءالى باعانى كوتەرۋ ەمەس, بۇل – جاي عانا تەڭەستىرۋ. 92 ماركالى بەنزيننىڭ ناقتى نارىقتاعى شىعىنسىز قۇنى 60 تسەنتكە تەڭ, بۇل – 320-350 تەڭگە. ءبىز بۇعان بىرتە-بىرتە جەتەمىز. ۇكىمەت, مينيسترلىك تاڭداعان ۇلگى باعانى بىرتىندەپ السىرەتىپ جاتقانى انىق», – دەيدى ساراپشى ولجاس ءبايدىلدينوۆ.
ەنەرگەتيكا مينيسترلىگى الاڭداتارلىق بولجامىن ايتتى: ەل كۇزدە جانارماي تاپشىلىعىنا ۇشىراۋى مۇمكىن. وعان سەبەپ – رەسەي ءرۋبلىنىڭ قىمباتتاۋى جانە سونىڭ سالدارىنان قازاقستاندىق بەنزيننىڭ رەسەي فەدەراتسياسىنا كولەڭكەلى ەكسپورتىنىڭ ءوسۋى. بۇل رەتتە ۇكىمەت جانارماي باعاسىن تۇراقتاندىرۋ شارالارى قازىردىڭ وزىندە قابىلدانىپ جاتقانىن ايتىپ سەندىرىپ وتىر.
«بەنزين مەن ديزەل وتىنىنا كەلسەك, جاعدايدى وزدەرىڭىز جاقسى ءبىلىپ وتىرسىزدار, جانار-جاعار مايدىڭ بۇل تۇرلەرى كورشىلەرىمىزگە قاراعاندا مۇندا الدەقايدا ارزان جانە ونىڭ كونتراباندالىق جولمەن دە, زاڭدى جولمەن دە تىكەلەي كەتۋى بايقالادى, ترانزيتتىك كولىك ارزان جانارماي قۇيىپ, ەلىمىز ارقىلى وتىپ, بارىمىزگە تاپشىلىق تۋعىزادى, سوندىقتان ونىڭ سىرتقا كەتۋىنە جول بەرمەۋ ءۇشىن باعانى بىرتىندەپ تەڭەستىرەمىز», – دەپ ءتۇسىندىردى پرەمەر-ءمينيستردىڭ ءبىرىنشى ورىنباسارى رومان سكليار.
تەلەارنا تىلشىلەرى كورشى ەلدەردەگى بەنزين باعاسىن سالىستىرىپ كورگەن. ماسەلەن, رەسەيدە اي-92 ماركالى بەنزيننىڭ ءليترى ورتا ەسەپپەن 400 تەڭگەدەي, قىرعىزستاندا 460 تەڭگە, وزبەكستاندا 485 تەڭگە تۇرادى.
قازاقستان شىمكەنت مۇناي وڭدەۋ زاۋىتىنىڭ كەڭەيۋىنە يەك ارتا وتىرىپ, جانار-جاعارماي ءوندىرىسىن ارتتىرۋدى جوسپارلاپ وتىرعانى ايتىلعان. مۇناي وڭدەۋ كولەمىن 6 ميلليون توننادان 12 ميلليون تونناعا دەيىن ۇلعايتۋعا مۇمكىندىك بەرەتىن مۇناي وڭدەۋ زاۋىتىنىڭ ەكىنشى كەزەگىن سالۋ جوسپارلانعان.
ەاەو ەلدەرىمەن شەكاراداعى وتكىزۋ بەكەتتەرىندە دە مۇناي ونىمدەرىن ەكسپورتتاۋ ارەكەتتەرى توقتاتىلىپ جاتقانىن مالىمدەدى. بۇل شارالار بەنزين مەن ديزەل وتىنىنىڭ جالپى قورىنىڭ ارتۋىنا اكەلدى. وسىلايشا, ەنەرگەتيكا مينيسترلىگىنىڭ مالىمەتىنشە, قازىر ىشكى نارىقتا مۇناي ونىمدەرىنىڭ تۇراقتى جاعداي بايقالىپ وتىر.
