قارجى جانە تولەمدەر
مينيسترلىك مۇگەدەكتىك جانە اسىراۋشىسىنان ايىرىلۋ بويىنشا تولەنەتىن الەۋمەتتىك تولەمدەردىڭ كولەمىن ايتتى
2024 جىلى مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردى (بۇدان ءارى – ءماج) تولەۋگە رەسپۋبليكالىق بيۋدجەتتەن 613,1 ملرد تەڭگە جۇمسالدى. بۇعان قوسىمشا مەملەكەتتىك الەۋمەتتىك ساقتاندىرۋ قورىنان (بۇدان ءارى – ماسق) ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ بويىنشا شامامەن 80,3 ملرد تەڭگە سوماسىنا الەۋمەتتىك تولەمدەر جۇزەگە اسىرىلدى.
2024 جىلدىڭ قورىتىندىسى بويىنشا مۇگەدەكتىگى بويىنشا ءماج الۋشىلار سانى شامامەن 552,3 مىڭ ادامدى, اسىراۋشىسىنان ايىرىلۋ جاعدايى بويىنشا – شامامەن 193,9 مىڭ ادامدى قۇرادى.
مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا جانە سەبەبىنە, سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەن كۇنكورىس دەڭگەيىنىڭ شاماسىنا بايلانىستى بولادى.
اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى قايتىس بولعان اسىراۋشىنىڭ اسىراۋىنداعى ادامداردىڭ سانىنا, قايتىس بولۋ سەبەپتەرىنە جانە ەڭ تومەن كۇنكورىس دەڭگەيىنە بايلانىستى بولادى.
بۇدان باسقا, مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا الەۋمەتتىك تاۋەكەلدەر تۋىنداعان جاعدايدا ماسق-تان الەۋمەتتىك تولەمدەر جۇزەگە اسىرىلادى.
2024 جىلى 102,3 مىڭ ادام ەڭبەك ەتۋ قابىلەتىنەن ايىرىلۋ بويىنشا الەۋمەتتىك تولەم, ال شامامەن 67,9 مىڭ وتباسى اسىراۋشىسىنان ايىرىلۋ بويىنشا الەۋمەتتىك تولەم الدى.
