مينيسترلىك وقۋشى سومكەسىنىڭ سالماعى قانشا بولۋ كەرەكتىگىن ايتتى

قازاقستاننىڭ دەنساۋلىق ساقتاۋ مينيسترلىگىنىڭ وكىلدەرى مەكتەپ سومكەسىنە قاتىستى اتا-انالارعا ۇندەۋ جاساپ, وقۋشىلارعا ارنالعان سومكەلەردى قالاي دۇرىس تاڭداۋ كەرەكتىگىن ايتتى. بۇل تۋرالى Qandastar.kz ۆەدومستۆونىڭ ءباسپاسوز قىزمەتىنە سىلتەمە جاساپ حابارلايدى.

دەنساۋلىق ساقتاۋ مينيسترلىگى جاڭا وقۋ جىلىندا بالاعا ارنالعان سومكەنى دۇرىس تاڭداۋ اسا ماڭىزدى ەكەنىن جەتكىزدى. مەديتسينا قىزمەتكەرلەرىنىڭ مالىمەتىنشە, تىم اۋىر ءارى قولايسىز سومكە وقۋشىنىڭ دەنساۋلىعىنا زيان كەلتىرۋى مۇمكىن.

نورمالارعا سايكەس سالماق: • 1–3 سىنىپ — 2 كگ دەيىن • 4–5 سىنىپ — 2,5 كگ دەيىن • 6–7 سىنىپ — 3,5 كگ دەيىن • 8–11 سىنىپ — 4,5 كگ دەيىن

مينيسترلىك وكىلدەرى سومكەنىڭ سالماعى بالانىڭ دەنە سالماعىنىڭ 10%-نان اسپاۋى ءتيىس ەكەنىن ەسكەرتتى.

ماماندار كەڭ ءارى جۇمساق توسەمدى بەلدىكتەرى بار, ارقاسى ورتوپەديالىق بولىپ كەلەتىن سومكەلەردى تاڭداۋعا كەڭەس بەرەدى. وعان قوسا سومكەنىڭ جەڭىل جانە سۋ وتكىزبەيتىن ماتەريالدان جاسالۋى ماڭىزدى, جارىق شاعىلىستىرعىشتار دا مىندەتتى تۇردە بولۋى كەرەك دەيدى ولار.

مينيسترلىك وكىلدەرى اتا-انالاردى بالانىڭ سومكەسىن ارتىق زاتتاردان تازالاپ تۇرۋعا, ونى ەكى يىقپەن كيىپ جۇرۋگە ۇيرەتۋگە شاقىردى. سومكە اۋىر بولىپ جاتسا, كىتاپتاردى مەكتەپتە قالدىرۋدى مۇعالىممەن اقىلداسۋعا كەڭەس بەردى.