ءبىلىم
مينيسترلىك جاۋابى: اۋىل مەن قالا مەكتەبى اراسىنداعى الشاقتىق ازايدى ما?
فوتو: حالىق ءۇنى
ەلىمىزدە مەملەكەت باسشىسىنىڭ تاپسىرماسىمەن اۋىل مەكتەپتەرىنىڭ الەۋەتىن ارتتىرۋ بويىنشا جۇيەلى جۇمىستار جۇرگىزىلۋدە. وسى باعىتتاعى جۇمىستاردىڭ قورىتىندىسى تۋرالى وقۋ-اعارتۋ ءمينيسترى عاني بەيسەمباەۆ ۇكىمەت وتىرىسىندا باياندادى, دەپ جازادى qandastar.kz
ونىڭ ايتۋىنشا, بۇگىندە قازاقستاندا 8 مىڭعا جۋىق مەكتەپ جۇمىس جاساۋدا, ونىڭ ىشىندە 67%-ى اۋىل مەكتەبى. ايتا كەتۋ كەرەك, اۋىل مەكتەبىنىڭ ءاربىر ەكىنشىسى شاعىن جيناقتى بولىپ تابىلادى. 
وقۋشىلاردىڭ 40% اۋىل مەكتەبىندە ءبىلىم الادى. سوندىقتان ۇكىمەت اۋىل مەكتەپتەرىن دامىتۋ, ولاردىڭ ماتەريالدىق-تەحنيكالىق بازاسىن نىعايتۋ جانە قالا مەن اۋىل مەكتەپتەرىنىڭ اراسىنداعى الشاقتىقتى ازايتۋعا اسا ءمان بەرۋدە.
«اۋىل مەن قالا مەكتەپتەرى اراسىنداعى ءبىلىم ساپاسىنداعى الشاقتىقتىڭ ازايعانىن PISA حالىقارالىق زەرتتەۋلەرى ايقىنداپ وتىر. دەگەنمەن PISA-2018 ناتيجەلەرىمەن سالىستىرعاندا, 2022 جىلعى ماتەماتيكالىق جانە جاراتىلىستانۋ ساۋاتتىلىعى بويىنشا ايىرماشىلىق كورسەتكىشى 4-5 بالعا دەيىن قىسقاردى, ال وقۋ ساۋاتتىلىعى وزگەرىسسىز قالدى», – دەپ اتاپ ءوتتى عاني بەيسەمباەۆ.
ەستەرىڭىزگە سالا كەتەيىك, ماتەماتيكالىق ساۋاتتىلىق بويىنشا PISA-2018-دە قالا مەكتەپتەرى مەن اۋىل مەكتەپتەرى اراسىنداعى بىلىمدەگى الشاقتىق – 22 بالدى قۇراسا, PISA-2022-دە الشاقتىق 18 بالعا تومەندەتىلدى. جاراتىلىستانۋ-عىلىمي ساۋاتتىلىق بويىنشا 2018 جىلى الشاقتىق 31 بالدى قۇرادى, ال 2022 جىلى ول 26 بالعا دەيىن ازايتىلدى. وسىلايشا, حالىقارالىق زەرتتەۋلەر اۋىل مەكتەپتەرىندە ءبىلىم بەرۋ ساپاسىنىڭ ارتىپ كەلە جاتقانىن ايعاقتايدى.
