جاڭالىقتار
مينۋستان شىقتى. ءنۇرالي اليەۆ ءۇشىن 2023 جىل نەگە جايلى بولدى?
نۇرسۇلتان نازارباەۆتىڭ جيەنى نۇرالى اليەۆ نەگىزگى اكتسيونەرى سانالاتىن «ترانستەلەكوم» اكتسيونەرلىك قوعامى 2023 جىلى 10,7 ميلليارد تەڭگە تازا پايدا كوردى. ال 2022 جىلى «ترانستەلەكوم» 11,1 ميلليارد تەڭگە شىعىنعا باتقان بولاتىن.
ءنۇرالي اليەۆ Unit Telecom فيرماسى ارقىلى «ترانستەلەكومنىڭ» 75 پايىز اكتسياسىن ۇستاپ وتىر. قالعان 25 پايىزى «قازاقستان تەمىر جولى» ۇلتتىق كومپانياسىنىڭ قولىندا. بۇدان شىعاتىن ءبىر قورىتىندى – مەملەكەت تە «ترانستەلەكومنىڭ» پايداعا شىعىپ, ديۆيدەند اكەلە باستاعانىن قالايدى.
قازىر كومپانيادا قوردالانعان جانە ۇلەستىرىلمەگەن 23,3 ميلليارد تابىس بار. ونىڭ 17,5 ميلليارد تەڭگەسى ءنۇرالي اليەۆكە تيەسىلى. قالعانىن «قتج» الا الادى. 2022 جىلمەن سالىستىرعاندا «ترانستەلەكومنىڭ» اكتيۆتەرى 30 ميلليارد تەڭگەگە ازايىپ, قازىر 190 ميلليارد تەڭگەنىڭ توڭىرەگىنە تۇراقتادى.
«فوربس» ەسەبىنشە, ءنۇرالي اليەۆتىڭ داۋلەتى 220 ميلليون دوللارعا باعالانادى. ونىڭ ەڭ ماڭىزدى اكتيۆى وسى – «ترانستەلەكوم». ودان بولەك, «Capital Holding» پەن «Darmen Holding» فيرمالارىندا قوماقتى ۇلەسى بار. سونىمەن بىرگە, نۇرسۇلتان نازارباەۆتىڭ جيەنى دۋبايدا Donatello Hotels and Resorts قوناقۇيىنە, الماتى مەن استاناداعى بىرنەشە مەيرامحانالارعا يەلىك ەتەدى.
كەزىندە استانا اكىمىنىڭ ورىنباسارى رەتىندە ءنۇرالي اليەۆ LRT جوباسىن بەكىتۋگە قاتىسقان بولاتىن. ارتىنان, وسى ىسكە قاتىستى ۇستالىپ, كەيىن سوتتالعاندار ونىڭ دا جاۋاپقا تارتىلۋىن تالاپ ەتكەن ەدى.
«جاڭا قازاقستاننىڭ» سىلتەگەن قامشىسى بۇل جولى اليەۆكە تيە قويمادى. بىراق «ترانستەلەكوم» داعدارىستان شىعىپ, اقشاسى مولايا تۇسسە, ءنۇرالي راحات ۇلىنا قوسىمشا سۇراقتار تۋىنداي باستايتىنىن ىشتەي سەزەمىز. ويتكەنى جاقىندا «قتج»-نىڭ بۇرىنعى باسشىسى ەرلان اتامقۇلوۆ سقحبات بەرىپ, «ترانستەلەكومعا» قاتىستى ءبىراز قۇپيانىڭ بەتىن اشقان بولاتىن.
