Jańalyqtar
Mınýstan shyqty. Nurálı Álıev úshin 2023 jyl nege jaıly boldy?
Nursultan Nazarbaevtyń jıeni Nuraly Álıev negizgi akıoneri sanalatyn «Transtelekom» akıonerlik qoǵamy 2023 jyly 10,7 mıllıard teńge taza paıda kórdi. Al 2022 jyly «Transtelekom» 11,1 mıllıard teńge shyǵynǵa batqan bolatyn.
Nurálı Álıev Unit Telecom fırmasy arqyly «Transtelekomnyń» 75 paıyz akııasyn ustap otyr. Qalǵan 25 paıyzy «Qazaqstan temir joly» ulttyq kompanııasynyń qolynda. Budan shyǵatyn bir qorytyndy – memleket te «Transtelekomnyń» paıdaǵa shyǵyp, dıvıdend ákele bastaǵanyn qalaıdy.
Qazir kompanııada qordalanǵan jáne úlestirilmegen 23,3 mıllıard tabys bar. Onyń 17,5 mıllıard teńgesi Nurálı Álıevke tıesili. Qalǵanyn «QTJ» ala alady. 2022 jylmen salystyrǵanda «Transtelekomnyń» aktıvteri 30 mıllıard teńgege azaıyp, qazir 190 mıllıard teńgeniń tóńiregine turaqtady.
«Forbs» esebinshe, Nurálı Álıevtiń dáýleti 220 mıllıon dollarǵa baǵalanady. Onyń eń mańyzdy aktıvi osy – «Transtelekom». Odan bólek, «Capital Holding» pen «Darmen Holding» fırmalarynda qomaqty úlesi bar. Sonymen birge, Nursultan Nazarbaevtyń jıeni Dýbaıda Donatello Hotels and Resorts qonaqúıine, Almaty men Astanadaǵy birneshe meıramhanalarǵa ıelik etedi.
Kezinde Astana ákiminiń orynbasary retinde Nurálı Álıev LRT jobasyn bekitýge qatysqan bolatyn. Artynan, osy iske qatysty ustalyp, keıin sottalǵandar onyń da jaýapqa tartylýyn talap etken edi.
«Jańa Qazaqstannyń» siltegen qamshysy bul joly Álıevke tıe qoımady. Biraq «Transtelekom» daǵdarystan shyǵyp, aqshasy molaıa tússe, Nurálı Rahatulyna qosymsha suraqtar týyndaı bastaıtynyn ishteı sezemiz. О́ıtkeni jaqynda «QTJ»-nyń burynǵy basshysy Erlan Atamqulov sqhbat berip, «Transtelekomǵa» qatysty biraz qupııanyń betin ashqan bolatyn.
