Mınýtyna 17 myń sóz oqıtyn aqtaýlyq oqýshy kópshilikti tańǵaldyrdy

Aqtaý qalasynyń 6-synyp oqýshysy Samır Valerıı týraly mınýtyna 17 myń sóz oqıdy, dep habarlaıdy Qandastar.kz aqparat portaly.

Oqý-aǵartý mınıstrligi «100 jańa esim — 100 novyh lı» aıdary aıasynda qabileti kez-kelgendi tańǵaldyratyn Aqtaý qalasynyń 6-synyp oqýshysy Samır Valerıı týraly vıdeo júktedi.

Eki jyl buryn Samır mınýtyna 90 sózden artyq oqı almaıtyn. Alaıda, júıeli jattyǵýlar men ustazynyń qoldaýynyń arqasynda kórsetkishin edáýir jaqsartty. Qazir onyń oqý jyldamdyǵy mınýtyna 16–17 myń sózge jetedi.

Aqparatty joǵary jyldamdyqpen qabyldaý Samırge sabaqta ózine senimdi bolýǵa jáne tek gýmanıtarlyq pánderde ǵana emes, naqty ǵylym pánderinde de jetistikke jetýge kómektesýde. Ol qalalyq jáne aýdandyq olımpıadalardyń júldegeri, al 2023 jyly mektebinde «Jyl oqýshysy» ataǵyna ıe boldy.

Samır synyptastary arasynda uıymshyl, maqsatker jáne jaýapty oqýshy retinde tanymal. Ol mektep ómirine belsene aralasyp, kóshbasshylyq qabiletin jáne ósýge degen umtylysyn kórsetip júr. Onyń aıtýynsha, bolashaqta el ıgiligi úshin qyzmet etip, bilim, óner jáne sport salalarynda ózin tanytqysy keledi.