قارجى جانە تولەمدەر
ءموبيلدى اۋدارىمدار: كىمدەر باقىلاۋعا الىنادى?
فوتو: gov.kz
1 قاڭتاردان باستاپ اي سايىن 100 ءتۇرلى تۇلعادان ءموبيلدى اۋدارىم العان ازاماتتار باقىلاۋعا الىنادى.
1 قاڭتاردان باستاپ اي سايىن 100 ءتۇرلى تۇلعادان ءموبيلدى اۋدارىم العان ازاماتتار باقىلاۋعا الىنادى, – دەپ حابارلايدى qandastar.kz Qaz365.kz-كە سىلتەمە جاساپ.
مەملەكەتتىك كىرىستەر كوميتەتىنىڭ اقپاراتىنشا, قازىر كەيبىر كاسىپكەرلەر بانكتەردە اشىلعان جەكە شوتىنا ساتىلعان تاۋار, كورسەتىلگەن قىزمەت ءۇشىن ءموبيلدى اۋدارىمدار ارقىلى اقى الادى. ياعني, باقىلاۋ-كاسسا ماشينالارى (بكم) مەن POS-تەرمينالداردى قولدانبايدى, تيىسىنشە كليەنتكە چەك بەرمەيدى.
سالىق ورگاندارى بۇل ەسكەرتۋ تۇرىندەگى اكىمشىلىك جاۋاپكەرشىلىك كوزدەلگەن زاڭبۇزۋشىلىق ەكەنىن ەسكە سالدى. ال ەگەر زاڭبۇزۋشىلىق قايتالانسا, سالىق تولەۋشىنىڭ سۋبەكتىلىگىنە بايلانىستى 15-تەن (51 750 تەڭگە) 50 اەك-كە (172 500 تەڭگە) دەيىن ايىپپۇل سالىنادى.
كىمدەر باقىلاۋعا الىنادى?
قازاقستان كونستيتۋتسياسىنا سايكەس سالىق تولەۋ – اركىمنىڭ مىندەتى. سالىق ورگاندارى زاڭسىز كاسىپكەرلىك قىزمەتتى كولەڭكەدەن شىعارۋ ماقساتىندا ءتيىستى باقىلاۋ جۇرگىزەدى. 2024 جىلدان باستاپ بانك ۇيىمدارى جەكە كاسىپكەرلەردىڭ ءموبيلدى اۋدارىمدارى بويىنشا دەرەكتەردى بەرەدى. كۇنتىزبەلىك ءۇش اي قاتارىنان اي سايىن 100 ءتۇرلى تۇلعادان ءموبيلدى اۋدارىمدار العان ازاماتتار باقىلاۋعا الىنادى.
باقىلاۋ-كاسسا ماشينالارىن قولدانۋدى جەڭىلدەتۋ ءۇشىن 2022 جىلدان باستاپ بكم فۋنكتسيالارىن ەكىنشى دەڭگەيدەگى بانكتەردىڭ POS-تەرمينالدارىمەن بىرىكتىرۋ بويىنشا قاناتقاقتى جوبا جۇرگىزىلىپ جاتىر. بۇل بكم مەن POS-تەرمينالدىڭ ءبىر چەگىن بەرۋگە مۇمكىندىك بەرەدى. اتالعان جوباعا قاتىسىپ جاتقان بانكتەر – «كاسپي بانك» اق, «حالىق بانك» اق جانە «بانك تسەنتركرەديت» اق.
سونىمەن قاتار بكم چەكتەرىن بەرمەۋ فاكتىلەرىن انىقتاۋ بويىنشا «ازاماتتىق باقىلاۋ – چەكتى تالاپ ەت» اكتسياسى دا قولعا الىندى. انىقتالعان بۇزۋشىلىقتار تۋرالى «Wipon cashback» تەگىن ءموبيلدى قوسىمشاسى ارقىلى حابارلاۋعا بولادى.
قارجى مينيسترلىگىنىڭ مالىمدەۋىنشە, جوعارىدا اتالعان وزگەرىستەر ادال سالىق تولەۋشىلەرگە اسەر ەتپەيدى جانە تەك زاڭسىز كاسىپكەرلىك قىزمەتتى كولەڭكەدەن شىعارۋعا باعىتتالعان. ياعني, جەكە تۇلعالار, بۇرىنعىداي, وزدەرىنىڭ جەكە ماقساتتارى ءۇشىن تۋىستارىنا, دوستارىنا, اتا-انالارى مەن بالالارىنا جانە باسقا دا ومىرلىك جاعدايلارعا ارنالعان اۋدارىمداردى جاساي الادى جانە قابىلداي الادى.
