جاڭالىقتار
«موينىما بۇعاۋ سالدى. دەم جەتپەي بارادى»: تەمىرلان ەڭسەبەكتىڭ سوتىندا نە بولدى?
فوتو:Orda.kz.
11 ءساۋىر كۇنى الماتى قالاسىنىڭ ناۋرىزباي اۋداندىق سوتىندا ينستاگرامداعى Qaznews24 ساتيرا پابليگىنىڭ اۆتورى تەمىرلان ەڭسەبەككە قاتىستى قىلمىستىق ءىس بويىنشا سوت ۇكىمى شىقتى. وعان ۇلتارالىق ارازدىق قوزدىردى دەگەن ايىپ تاعىلىپ, ەكسترەميست دەپ تانىلدى, دەپ جازدى qandastar.kz
سوتتا احۋال شيەلەنىسىپ, ادۆوكاتتىڭ وتىنىشتەرى قاناعاتتاندىرىلمادى جۋرناليستەردى قىزمەتكەرلەر قاتاڭ باقىلاۋدا ۇستادى. ال سۋديا «سوت قوعام پىكىرىنە سۇيەنبەيدى» دەپ مالىمدەدى, دەپ حابارلايدى Orda.kz.
10 ءساۋىر كۇنى وتكەن سوت وتىرىسىندا عيمارات ماڭىنا جينالعان تەمىرلاننىڭ جاقتاستارى زالدان بەينەترانسلياتسيا قوسۋدى تالاپ ەتتى. الايدا پوليتسيا قىزمەتكەرلەرى ولاردىڭ تالابىنا جاۋاپ بەرمەي, كۇشتەپ پوليتسيا بولىمشەسىنە اكەتتى.
بولىمگە جەتكىزىلگەن تەمىرلان ەڭسەبەكتىڭ جاقتاستارى: دارحان ءشارىپوۆ, ايگۇل نۇربولاتوۆا, ماريا كوچنەۆا جانە قوڭىسباي ايريسكە حاتتاما تولتىرىلىپ, 78 640 تەڭگە ايىپپۇل سالىندى.
11 ءساۋىر كۇنى سوت زالىنا بۇكىل باق وكىلدەرى كىرگىزىلدى. Orda.kz ءتىلشىسى دە وسى سوتقا باستان-اياق قاتىستى.
قورعاۋشى ادۆوكات سوت زالىنا كىرە الماعان باق وكىلدەرى مەن جاقتاستارىنا ارنايى ونلاين ترانسلياتسيا جۇرگىزۋگە ءوتىنىش بەردى. الايدا سۋديا ءوتىنىشتى قابىلدامادى.
«تاعى دا قايتالاپ ايتامىن, مۇنىڭ قاجەتى جوق. بارلىق باق وكىلدەرى سوت زالىنا كىرگىزىلدى. تەحنيكالىق سەبەپتەرگە بايلانىستى ترانسلياتسيا جۇرگىزىلمەيدى, سەبەبى سوتتا زالدار سانى شەكتەۋلى. سوتتا ونداي مۇمكىندىكتەر جوق»,– دەدى سۋديا.
11 ءساۋىر كۇنى وتكەن سوت وتىرىسىندا كۋاگەرلەردەن جاۋاپ الىندى. ءتىنتۋ كەزىندە كۋاگەر بولعان ادام شاقىرىلدى.
تەرگەۋ يزولياتورىنان ونلاين قوسىلعان تەمىرلان ەڭسەبەك كۋاگەردى كورمەگەندىكتەن, سوت وتىرىسىن وفلاين وتكىزۋدى تالاپ ەتتى.
«مەن كۋاگەرلەردى كورىپ وتىرعان جوقپىن, سوتقا كەلىپ, ءوز كوزىممەن كورگىم كەلەدى. مەنەن باسقا ەشكىم كۋاگەردى كورگەن جوق. بۇل ادامنىڭ باسقا بىرەۋ ەمەس, سول كۋاگەر ەكەنىنە كوز جەتكىزگىم كەلەدى»,– دەدى تەمىرلان ەڭسەبەك.
ادۆوكات جانار بالعاباەۆا ەكى كۋاگەردىڭ تەرگەۋ كەزىندە بەرگەن جاۋاپتارى «جاتتاپ العانداي» ءبىر-بىرىنەن اينىمايتىنىنا نازار اۋداردى.
