موتوتانيا: تانىمال بايكەر قىز جول اپاتىنان كوز جۇمدى

فوتو: euroline.by

تۇركيادا «موتوتانيا» لاقاپ اتىمەن تانىمال رەسەيلىك بايكەر قىزدى وقىرماندارى مەن دوستارى اقتىق ساپارعا شىعارىپ سالدى, دەپ حابارلادى Qandastar.kz.

رەسەيلىك بايكەر, ءارى بلوگەر 38 جاستاعى تاتيانا وزولينانى كوپشىلىك «موتوتانيا» لاقاپ اتىمەن بىلەدى. ول موتوتسيكل تۋرالى ۆيدەولارى جانە ەرەكشە كەلبەتىنىڭ ارقاسىندا تانىمال.

بەلگىلى بولعانداي, تاتيانا وزولينا مۋگلا پروۆينتسياسىنىڭ ماڭىنداعى ميلاس ەلدى مەكەنىنە جاقىن جەردە ءوزىنىڭ موتوتسيكلىمەن اپاتقا ۇشىراعان. وزگە ارىپتەستەرىمەن ساپار بارىسىندا «موتوتانيا» كولىگىن باقىلاي الماي قالىپ, جۇك كولىگىنە سوقتىعىسقان. بويجەتكەن جەدەل جاردەم كەلگەنشە كوز جۇمعان.

تانيا وزولينا TikTok جەلىسىنە بولىسكەن ۆيدەولارى كوپ قارالىم جيناپ ۇلگەرگەن. سول جەلىدەگى سوڭعى ۆيدەوسىندا دا يزمير قالاسىنان بودرۋمعا جولعا شىققانىن, سونداي-اق, بولاشاققا دەگەن جوسپارلارىنىڭ كوپ ەكەنىن جازعان. الايدا ول ماقساتتارى ورىندالمادى. موتوتانيانىڭ ارتىندا كامەلەت جاسىنا تولماعان 13 جاستاعى ۇلى قالدى.

كەيبىر دەرەكتەر بويىنشا, ول تۇركيالىق بايكەرمەن سوقتىعىسىپ, اۋىر حالدە ەسىن جيماستان قايتىس بولعان. ايتا كەتۋ كەرەك, «موتوتانيانىڭ» YouTube-تەگى ارناسىنا 2 ميلليونعا جۋىق, ينستاگرامدا 1 ميلليونعا جۋىق وقىرمانى بار. ال TikTok-تا ونىڭ اككاۋنتىنا 5 ميلليون ادام جازىلعان.