ءمۇفتيات قازاقستاندىقتارعا ۇندەۋ جاسادى

قازاقستان مۇسىلماندارى ءدىني باسقارماسى قۇربان شالۋعا اقشا جينايتىن جالعان سەرۆيستەردەن ساق بولۋعا شاقىردى, دەپ حابارلايدى Qandastar.kz اقپارات پورتالى.

قمدب قۇربان شالۋ ءراسىمىن وڭايلاتۋ جانە ءادىل ۇيىمداستىرۋ ماقساتىندا qurban.muftyat.kz رەسمي ونلاين پلاتفورماسىن ىسكە قوسقان بولاتىن. بۇل سايت ارقىلى قۇرباندىق شالعىسى كەلگەن ءار ازامات قۇرباندىق مالىن تاڭداپ, قاراجاتتى قاۋىپسىز تۇردە اۋدارا الادى.

قۇربان شالۋ ءراسىمىن وڭايلاتۋ ءۇشىن قمدب تاراپىنان جاسالعان يگى باستامانى تەرىس ماقساتتا قولدانىپ, ءتۇرلى الاياقتىق ارەكەتتەرى ورىن الۋى ىقتيمال. وسى سەبەپتى ەلىمىزدىڭ ازاماتتارىن قورعاۋ ماقساتىندا ماڭىزدى ەسكەرتۋ جاسايمىز: قۇربان ايت مەرەكەسى كەزىندە وزدەرىنىڭ تەرىس ماقساتتارىن جۇزەگە اسىرۋ ءۇشىن كەيبىر بەلگىسىز ازاماتتار مەن ۇيىمدار جالعان قۇرباندىق سايتتارىن اشىپ, حالىقتى اداستىرىپ, قۇرباندىققا اۋدارعان قاراجاتتارىن وزگە ماقساتقا پايدالانىپ كەتۋى مۇمكىن. سوندىقتان بارشاڭىزدى اباي بولۋعا شاقىرامىز, — دەپ جازىلعان قمدب حابارلاماسىندا.

قازاقستان مۇسىلماندارى ءدىني باسقارماسى تەك سەنىمدى رەسمي پلاتفورما ارقىلى قۇرباندىق شالۋعا شاقىرادى.

كۇماندى سايتتار مەن بەيمالىم ادامداردىڭ ۇسىنىستارىنان ساق بولىڭىزدار. بۇل ءسىزدىڭ قاراجاتىڭىز بەن نيەتىڭىزدىڭ قاۋىپسىزدىگىن قامتاماسىز ەتۋدىڭ باستى جولى. اللا تاعالا بارشاڭىزدىڭ قۇرباندىقتارىڭىزدى قابىل ەتىپ, ىزگى نيەتتەرىڭىزدى ارتتىرسىن!, — دەلىنگەن حابارلامادا.