جاڭالىقتار
«مۇعالىمدەر قىسىم كوردى»: شىمكەنتتە وقۋشىلار توقسان بويى وقىماعان
فوتو: اشىق دەرەككوز
شىمكەنتتەگى مەكتەپتەردىڭ بىرىندە وقۋشىلار ءبىر توقسان بويى وقىماعان, دەپ حابارلايدى qandastar.kz Orda.kz-كە سىلتەمە جاساپ.
مەكتەپ اكىمشىلىگىنىڭ باسسىزدىعىنان ۇجىم تارقاپ كەتۋگە جاقىن. ءبىر توقسان بويى ساباق بولماعاندىقتان وقۋشىلار باسقا مەكتەپكە اۋىسىپ كەتىپ جاتىر. الدىن الا مالىمەت بويىنشا, مۇعالىمدەر ءوزارا تارتىسىپ, ءبىر-بىرىنە قىسىم كورسەتۋگە دەيىن بارعان.
«مەكتەپتە تۇسىنىكسىز جاعداي. ونىڭ ءبارى بالامىزعا كەرى اسەر ەتىپ جاتىر. ساباق كەستەسى مۇلدەم جوق. 10 مۇعالىم جۇمىستان كەتكەن», – دەيدى اتا-انا.
مەكتەپ ديرەكتورى جاڭا مۇعالىمدەردى قابىلداپ ءجۇرىپ ۋاقىت وتكىزىپ العانىن جاسىرمادى.
«ون مامان جۇمىستان شىعىپ, 10 ماماندى قابىلداپ الۋ ءۇشىن قىركۇيەك سوڭىنا دەيىن ۋاقىت جوعالتتىق. سوعان بايلانىستى كەيبىر پاندەردە ولقىلىق بولعانى راس. ساباق كەستەسىندە دە وزگەرىستەر بولدى», – دەيدى مەكتەپ ديرەكتورى.
مەكتەپتەگى باسسىزدىقتان ءبىر ساباققا 3 مۇعالىم كىرگەن كەزدەر بولعان. مۇعالىمنىڭ ساباق كەستەسىندە باسقا ءپان بولسا, وقۋشىنىڭ ساباق كەستەسى مۇلدەم باسقا بولىپ شىققان. سونداي-اق مەكتەپتە مۇعالىمدەردىڭ جالاقاسىن ۇستاپ قالۋ, اقشا تالاپ ەتۋ دە قالىپتى جاعدايعا اينالعان دەيدى ۇستازدار.
ەندى بۇل ماسەلەلەردى ءبىلىم باسقارماسى جانىنان قۇرىلعان كوميسسيا ساراپقا سالماقشى. وسى جيىندا مەكتەپ ديرەكتورى مەن ونىڭ ورىنباسارلارىنىڭ جانە بىرقاتار ۇستازداردىڭ تارتىپتىك جاۋاپكەرشىلىگى قارالىپ, قىزمەتىنە سايكەستىگى تۋرالى شەشىم شىعارىلادى.
