جاڭالىقتار
مۇعالىمدەردىڭ جالاقىسى تۋرالى جاڭا دەرەك شىقتى
قازاقستاندا قازىر 8 مىڭعا جۋىق مەكتەپ 3,9 ملن بالاعا ءبىلىم بەرۋدە. ۇكىمەت ونىڭ 352 مىڭى ءبىرىنشى سىنىپ وقۋشىلارى ەكەنىن ءمالىم ەتتى, دەپ qandastar.kz اقپاراتتىق پورتالى.
2024-2025 وقۋ جىلىندا ەلىمىزدىڭ مەكتەپتەرىندە 406 مىڭ پەداگوگ جۇمىس ىستەۋدە. وتكەن جىلمەن سالىستىرعاندا ۇستازدار سانى 8 مىڭعا ارتقان.
2020 جىلدان باستاپ پەداگوگ مارتەبەسىن كوتەرۋ ساياساتى شەڭبەرىندە مۇعالىمدەردىڭ جالاقىسى 100%-عا كوبەيدى. 2023 جىلى مەكتەپكە دەيىنگى تاربيەشىلەر مەن تەحنيكالىق جانە كاسىپتىك ءبىلىم بەرۋ پەداگوگتەرىنە قوسىمشا ۇستەماقىلار, سونداي-اق بىلىكتىلىك ساناتتارى, ەڭبەك ءوتىلى, ەڭبەك جاعدايلارى, اكادەميالىق دارەجەسىنىڭ بولۋى جانە تالىمگەرلىك ءۇشىن قوسىمشا اقىلار ەنگىزىلدى.
اۋىلدىق جەرلەردە مۇعالىمدەردىڭ جالاقىسى قالاداعى جالاقىدان كەم دەگەندە 25%-عا جوعارى. 2025 جىلى 11 مىڭنان استام پەداگوگ بىلىكتىلىكتى ارتتىرۋ كۋرستارىنان وتكەن, ولاردىڭ شامامەن 58%-ى اۋىل مۇعالىمدەرى. 2025 جىلعى 1 قاڭتاردان باستاپ اتتەستاتتاۋ پروتسەسىنىڭ اشىقتىعىن قامتاماسىز ەتەتىن پەداگوگتەردىڭ ۇزدىكسىز كاسىبي دامۋىنىڭ جاڭا پلاتفورماسى جۇمىسىن باستادى.
رەسپۋبليكادا پەداگوگتەردى اتتەستاتتاۋدىڭ اۆتوماتتاندىرىلعان جۇيەسى بار. وسىلايشا, 2025 جىلعى 1 قاڭتاردان باستاپ مۇعالىمدەردىڭ ۇزدىكسىز كاسىبي دامۋىنا ارنالعان «ۇستاز» ۇلتتىق پلاتفورماسىن كەزەڭ-كەزەڭىمەن ەنگىزۋ باستالدى. بۇل پلاتفورما اتتەستاتتاۋ ۇدەرىسىن اناعۇرلىم اشىق ەتەدى. 2025 جىلى پلاتفورما ارقىلى 150 مىڭعا جۋىق قازاقستاندىق پەداگوگ اتتەستاتتاۋدان وتەدى.
پرەزيدەنتتىڭ باستاماسىمەن بارلىق ءبىلىم بەرۋ ۇيىمدارىندا «ادال ازامات» بىرىڭعاي تاربيە باعدارلاماسى ەنگىزىلۋدە. بيىلدان باستاپ وعان جەكە مەكتەپتەر دە قوسىلىپ, 2026 جىلى اۋقىمدى تاراتۋ ءۇشىن شارالار قابىلدانادى.
