مۇعالىمگە بالاعات ءسوز ايتقان نازارباەۆ زياتكەرلىك مەكتەبىنىڭ وقۋشىسى قاراپايىم مەكتەپكە اۋىستى

فوتو: ۆيدەودان سكرين

«نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما توراعاسى ءانۋار جانعوزين الماتىدا 11-سىنىپ وقۋشىسىنىڭ وقۋدان شىعارىلۋىنا قاتىستى پىكىر ءبىلدىردى, دەپ جازدى qandastar.kz

بۇل تۋرالىStan.kz اقپارات اگەنتتىگى حابارلايدى.

ءانۋار جانعوزين وقۋشىمەن, اتا-انالارمەن جانە پەداگوگيكالىق ۇجىممەن كەزدەسۋ وتكىزگەنىن مالىمدەدى. 

“تالقىلاۋعا وقۋ-اعارتۋ مينيسترلىگىنىڭ وكىلدەرى, وڭىرلىك بالا قۇقىقتارى جونىندەگى ۋاكىل مەن قوعامدىق كەڭەستىڭ مۇشەلەرى قاتىستى. كەزدەسۋ بارىسىندا بۇعان دەيىن قابىلدانعان شەشىم قايتا قارالىپ, تاراپتار ءوزارا تۇسىنىستىككە كەلدى. نازارباەۆ زياتكەرلىك مەكتەبى ءوز شەشىمىن وزگەرتپەيدى. وقۋشى مەكتەپتەن شىعارىلىپ, مەملەكەتتىك جالپى ءبىلىم بەرەتىن مەكتەپكە اۋىستىرىلدى. وقۋشىنىڭ اتا-اناسى تاراپىنان ەشقانداي قارسىلىق جوق”, – دەپ جازدى جانعوزين.

جانعوزيننىڭ ايتۋىنشا, نازارباەۆ زياتكەرلىك مەكتەپتەرى شاكىرتتەرگە ءاردايىم قۇرمەتپەن قاراپ, قولداۋ كورسەتەدى.

“نازارباەۆ زياتكەرلىك مەكتەپتەرى وزارا سىيلاستىققا نەگىزدەلگەن سىندارلى قارىم-قاتىناستى باستى قاعيدا رەتىندە ۇستانادى. دەگەنمەن, مۇعالىمدەرگە قۇرمەتپەن قاراۋ – مەكتەپ ءۇشىن وزگەرمەيتىن جانە قاتاڭ ساقتالاتىن تالاپ. قوعامنىڭ بۇل ماسەلەگە بەيجاي قاراماي, بەلسەندىلىك تانىتقانىنا العىس بىلدىرەمىن. ءبىز كەرى بايلانىس پەن اشىق ديالوگتى جوعارى باعالايمىز. سونداي-اق وقۋ-اعارتۋ مينيسترىنە, مينيسترلىك وكىلدەرىنە جانە بالا قۇقىقتارى جونىندەگى ۋاكىلدەرگە اتالعان جاعدايعا ءجىتى كوڭىل ءبولىپ, قولداۋ كورسەتكەندەرى ءۇشىن ريزاشىلىعىمدى بىلدىرەمىن”, – دەپ جازدى ول.

ايتا كەتەيىك, بۇعان دەيىن نازارباەۆ زياتكەرلىك مەكتەبى وقۋشىنى ءبىتىرۋ كەشىنە ءبىر كۇن قالعاندا وقۋدان شىعارىپ جىبەرگەنى ايتىلدى. كەيىن وقۋشى كەشىرىم سۇراپ, ءوز نۇسقاسىن ايتىپ, پرەزيدەنتكە ۇندەۋ جولداعان ەدى.