مۇعالىمنەن شاپالاق جەگەنىمنىڭ ارقاسىندا قازىر قالادا شوكولاد جەپ ءجۇرمىن – سايات مەدەۋوۆ

ءانشى سايات مەدەۋوۆ وقۋشى كەزىندەگى ەستەلىگىن ورتاعا سالىپ, اۋىلدان قالاعا كوشۋىنە نە تۇرتكى بولعانىن ايتتى, دەپ حابارلايدى Qandastar.kz اقپارات پورتالى.

«تاڭشولپان» باعدارلاماسىندا قوناقتا بولعان ءانشى 8-سىنىپتى بىتىرگەننەن كەيىن اۋىلدان مۇلدەم كەتۋدى قالاعان. وعان سەبەپ – سىنىپ جەتەكشىسى بارلىق وقۋشىنىڭ كوزىنشە ءانشىنى شاپالاقپەن ۇرىپ جىبەرگەن.

«مەكتەپتە كۇليپا دەگەن اپايىمىز بولدى. سول كىسى بۇكىل مەكتەپتىڭ الدىندا ءبىر شاپالاقپەن ۇرعانى بار. سىنىپتىڭ الدىندا ءبىر ۇردى. سوسىن لينەيكادا, بۇكىل مەكتەپتىڭ الدىندا ءبىر ۇردى. ول كىسى مەنىڭ سىنىپ جەتەكشىم بولاتىن. سول نامىسىما ءتيىپ كەتتى. سودان سوڭ وقىمايمىن, 8-سىنىپتان سوڭ قالاي دا كەتەمىن دەپ اۋىلدان كەتىپ قالدىم. قازىر ءبىر جاعىنان سول كۇليپا اپايعا راحمەت ايتامىن. اپكەمىزدىڭ شاپالاعىن جەيمىن دەپ قازىر قالادا شوكولاد جەپ ءجۇرمىن. ەگەر ول كىسى بولماسا كىم بىلەدى مەنىڭ تاعدىر جولىم باسقا جاققا, باسقا ارناعا بۇرىلار ما ەدى. باسقا جولعا ءتۇسىپ كەتە ەر مە ەدىم», – دەيدى ءانشى.

ءانشى مەكتەپتە بۇزىق بولماعانىن, ول ۋاقىتتا قازىرگىدەي ەمەس, مۇعالىمنەن قاتتى قورىققانىن ايتادى.

«العاشقى قوڭىراۋ عوي. ەڭ الدىڭعى پارتادا وتىراتىنمىن. بويىم دا «ۇزىن» عوي. اپايدىڭ كەلگەنىن كورگەن جوقپىن. بالالار ارت جاقتا بىردەڭە ايتىپ تۇرعان سوڭ ارتىما قاراپ ك ۇلىپ تۇرعانمىن. سول كەزدە سىنىپ جەتەكشىمىز كەلىپ قالىپتى. ءبارى تىنىشتالىپ قالدى. مەن الدىما قاراپ ەدىم, ول كىسى «نەگە ىرجيىپ تۇرسىڭ?» دەپ شاپالاقپەن تارتىپ جىبەردى. سول دۇرىس بولعان دەپ ويلايمىن. شاپالاق كەرەك بولدى. ەكىنشىسىندە لينەيكادا ساپتا تۇرعانىمدا ارتىمدا تۇرعان بالا يتەرىپ جىبەردى. ءبىر اتتاپ قايتا ارتقا كىرىپ ۇلگەرمەي قالدىم. انا كىسى كورىپ قالدى. سول كەزدە دە بۇكىل مەكتەپتىڭ الدىندا ەكىنشى رەت ۇردى. مەكتەپتە بۇزىق بولمادىم, سەبەبى ءبىز ول كەزدە مۇعالىمدەردەن قاتتى قورقاتىنبىز. قازىر ءتيىپ كەتسە «مەنىڭ بالاما نەگە تيەسىڭ?» دەپ شىعامىز عوي. بىراق ول كەزدە ءبىز مۇعالىمنىڭ تاياعىن جەدىك. ودان جامان بولعانىمىز جوق», – دەيدى ءانشى.