Muǵalimnen shapalaq jegenimniń arqasynda qazir qalada shokolad jep júrmin – Saıat Medeýov

Ánshi Saıat Medeýov oqýshy kezindegi esteligin ortaǵa salyp, aýyldan qalaǵa kóshýine ne túrtki bolǵanyn aıtty, dep habarlaıdy Qandastar.kz aqparat portaly.

«Tańsholpan» baǵdarlamasynda qonaqta bolǵan ánshi 8-synypty bitirgennen keıin aýyldan múldem ketýdi qalaǵan. Oǵan sebep – synyp jetekshisi barlyq oqýshynyń kózinshe ánshini shapalaqpen uryp jibergen.

«Mektepte Kúlıpa degen apaıymyz boldy. Sol kisi búkil mekteptiń aldynda bir shapalaqpen urǵany bar. Synyptyń aldynda bir urdy. Sosyn lıneıkada, búkil mekteptiń aldynda bir urdy. Ol kisi meniń synyp jetekshim bolatyn. Sol namysyma tıip ketti. Sodan soń oqymaımyn, 8-synyptan soń qalaı da ketemin dep aýyldan ketip qaldym. Qazir bir jaǵynan sol Kúlıpa apaıǵa rahmet aıtamyn. Ápkemizdiń shapalaǵyn jeımin dep qazir qalada shokolad jep júrmin. Eger ol kisi bolmasa kim biledi meniń taǵdyr jolym basqa jaqqa, basqa arnaǵa burylar ma edi. Basqa jolǵa túsip kete er me edim», – deıdi ánshi.

Ánshi mektepte buzyq bolmaǵanyn, ol ýaqytta qazirgideı emes, muǵalimnen qatty qoryqqanyn aıtady.

«Alǵashqy qońyraý ǵoı. Eń aldyńǵy partada otyratynmyn. Boıym da «uzyn» ǵoı. Apaıdyń kelgenin kórgen joqpyn. Balalar art jaqta birdeńe aıtyp turǵan soń artyma qarap kúlip turǵanmyn. Sol kezde synyp jetekshimiz kelip qalypty. Bári tynyshtalyp qaldy. Men aldyma qarap edim, ol kisi «Nege yrjıyp tursyń?» dep shapalaqpen tartyp jiberdi. Sol durys bolǵan dep oılaımyn. Shapalaq kerek boldy. Ekinshisinde lıneıkada sapta turǵanymda artymda turǵan bala ıterip jiberdi. Bir attap qaıta artqa kirip úlgermeı qaldym. Ana kisi kórip qaldy. Sol kezde de búkil mekteptiń aldynda ekinshi ret urdy. Mektepte buzyq bolmadym, sebebi biz ol kezde muǵalimderden qatty qorqatynbyz. Qazir tıip ketse «Meniń balama nege tıesiń?» dep shyǵamyz ǵoı. Biraq ol kezde biz muǵalimniń taıaǵyn jedik. Odan jaman bolǵanymyz joq», – deıdi ánshi.