مۇگەدەك بولىپ قالعان ساربازعا 140 ملن تەڭگە جينالدى

كوللاج: adyrna.kz

باسىنان جاراقات الىپ, مۇگەدەك بولىپ قالعان ساربازعا 140 ملن جينالدى, — دەپ حابارلايدى ozgeris.info.

بۇعان دەيىن سارباز ەربايان مۇحتار جايلى جازعان ەدىك. جەلىدە ساربازعا قاتىستى جانتۇرشىگەرلىك ۆيدەو تارادى. روليكتە ول اسكەرگە ءوز ەركىمەن كەتىپ, ارتىنشا اۋرۋحانادا اۋىر حالدە جاتقانى كورسەتىلەدى. سارباز التى ايدان بەرى كومادا جاتىر.

ەربايان مۇحتار اسكەردە باسىنان جاراقات العان. قازىرگى تاڭدا ول ءوز كۇشىمەن تاماقتانا المايدى جانە سويلەي المايدى.

ۇلتتىق ۇلان بۇل دەرەككە قاتىستى تەرگەۋ ءجۇرىپ جاتقانىن حابارلادى.

«قاتارداعى جاۋىنگەر مۇحتاردىڭ باسىنان سوققى الۋىنا بايلانىستى قىلمىستىق كودەكستىڭ 440-بابى 3-بولىگى 4-تارماعى بويىنشا قىلمىستىق ءىس قوزعالدى. قازىرگى تاڭدا قاجەت ساراپتامالار تاعايىندالدى. سوتالدى تەرگەۋ ءالى دە ءجۇرىپ جاتىر. تەرگەۋ بارىسى ءىىم باسشىلىعىنىڭ جەكە باقىلاۋىندا», — دەلىنگەن ۆەدومستۆو حابارلاماسىندا.

ۆەدومستۆو مالىمەتىنشە, رەابيليتاتسيالىق ەمنەن كەيىن ەرباياننىڭ اتا-اناسىنىڭ سۇراۋى بويىنشا سارباز ۇيىنە جىبەرىلگەن. قازىرگى تاڭدا ساربازعا مۇگەدەكتىك راسىمدەۋ جۇمىستارى جۇرگىزىلىپ جاتقان كورىنەدى.

بۇگىندە قازاقستاندىقتار ساربازدىڭ ەمىنە 140 ميلليونعا جۋىق اقشا جيناپ بەرگەن.

«ەرباياننىڭ اتا-اناسى كوزىنە جاس الدى, بۇكىل كوماندا قولداۋلارىڭىزعا العىس ايتادى. شىنى كەرەك, ايتارعا ءسوزىمىز جوق», — دەلىنگەن جازبادا.