جاڭالىقتار
مۇحتار شاحانوۆ بۇگىن 83 جاسقا تولدى
83 جىل بۇرىن (1942) قازاقستان رەسپۋبليكاسى پرەزيدەنتى جانىنداعى ۇلتتىق قۇرىلتاي مۇشەسى, قازاقستاننىڭ ەڭبەك ەرى, قازاقستان جانە قىرعىز رەسپۋبليكاسىنىڭ حالىق اقىنى, جازۋشى, قوعام قايراتكەرى مۇحتار شاحانوۆ دۇنيەگە كەلدى, دەپ حابارلايدى Qandastar.kz.
مۇحتار شاحانوۆ 1942 جىلى 2 شىلدەدە وڭتۇستىك قازاقستان وبلىسى (قازىرگى تۇركىستان وبلىسى) وتىرار اۋدانىندا دۇنيەگە كەلگەن. بالالىق شاعى تولە بي اۋدانىنداعى قاسقاسۋ ەلدى مەكەنىندە توبەنىڭ باسىندا اكەسى قازدىرعان جەرتولەدە ءوتتى. سول جەرتولەنىڭ جوعارى جاعىندا تاۋ بار, بالا اقىن العاشقى ولەڭدەرىن تاۋدىڭ بەتىندە تاستان جاسالعان ورىندىقتا وتىرىپ جازعان. اقىننىڭ اكەسى قاسقاسۋ ەلدى مەكەنىندە قاري مولدا بولعان, ول مۇحتار 9 جاستا بولعان كەزدە دۇنيەدەن ءوتتى. اناسى 13 قۇرساق كوتەرگەن.
«العاشقى ولەڭىمدى بالا كەزىمدە جازدىم, كەيىن 16 جاسىمدا رەسپۋبليكالىق گازەتكە شىقتى. سول كەزدە «16 جاسار اقىن شىقتى» دەپ جاريالاندى. بۇكىل قازاقستان شۋلادى. ەلدىڭ تۇكپىر-تۇكپىرىنەن 400-دەن اسا حات كەلدى. ەكى ادام ىزدەپ كەلدى, ونىڭ ءبىرى – ءشامشى قالداياقوۆ, ەكىنشىسى – قازاقتىڭ دارا تۇلعالى اقىنى تولەگەن ايبەرگەنوۆ», — دەيدى مۇحتار شاحانوۆ.
مۇحتار شاحانوۆتىڭ اناسى تولەگەن ايبەرگەنوۆ پەن ءشامشى قالداياقوۆتى ءوز ۇلىنداي كورگەن, ەكەۋى دە شاحانوۆتىڭ اناسىن ءوز اناسىنداي قۇرمەتتەپ وتكەن.
شاحانوۆتىڭ ايتۋىنشا, ول ناعاشى اعاسى ىسقاقتىڭ قولىندا تاربيەلەنگەن. ول كىسىنىڭ كۇنىنە ءبىر ادامعا جاقسىلىق جاسا دەگەن قاعيداسىن ومىرىنە ازىق ەتىپ الىپ قالعان. سول كىسىنىڭ ومىردەن وتەردە اراققا اۋەس بولما دەگەن ءبىر اۋىز ءسوزىن دە جەرگە تاستاعان ەمەسپىن, دەيدى ول.
