Muhtar Shahanov búgin 83 jasqa toldy

83 jyl buryn (1942) Qazaqstan Respýblıkasy Prezıdenti janyndaǵy Ulttyq quryltaı múshesi, Qazaqstannyń Eńbek Eri, Qazaqstan jáne Qyrǵyz Respýblıkasynyń halyq aqyny, jazýshy, qoǵam qaıratkeri Muhtar ShAHANOV dúnıege keldi, dep habarlaıdy Qandastar.kz. 

Muhtar Shahanov 1942 jyly 2 shildede Ońtústik Qazaqstan oblysy (qazirgi Túrkistan oblysy) Otyrar aýdanynda dúnıege kelgen. Balalyq shaǵy Tóle bı aýdanyndaǵy Qasqasý eldi mekeninde tóbeniń basynda ákesi qazdyrǵan jertólede ótti. Sol jertóleniń joǵary jaǵynda taý bar, bala aqyn alǵashqy óleńderin taýdyń betinde tastan jasalǵan oryndyqta otyryp jazǵan. Aqynnyń ákesi Qasqasý eldi mekeninde qarı molda bolǵan, ol Muhtar 9 jasta bolǵan kezde dúnıeden ótti. Anasy 13 qursaq kótergen.

«Alǵashqy óleńimdi bala kezimde jazdym, keıin 16 jasymda respýblıkalyq gazetke shyqty. Sol kezde «16 jasar aqyn shyqty» dep jarııalandy. Búkil Qazaqstan shýlady. Eldiń túkpir-túkpirinen 400-den asa hat keldi. Eki adam izdep keldi, onyń biri – Shámshi Qaldaıaqov, ekinshisi – qazaqtyń dara tulǵaly aqyny Tólegen Aıbergenov», — deıdi Muhtar Shahanov.

Muhtar Shahanovtyń anasy Tólegen Aıbergenov pen Shámshi Qaldaıaqovty óz ulyndaı kórgen, ekeýi de Shahanovtyń anasyn óz anasyndaı qurmettep ótken.

Shahanovtyń aıtýynsha, ol naǵashy aǵasy Ysqaqtyń qolynda tárbıelengen. Ol kisiniń kúnine bir adamǵa jaqsylyq jasa degen qaǵıdasyn ómirine azyq etip alyp qalǵan. Sol kisiniń ómirden óterde araqqa áýes bolma degen bir aýyz sózin de jerge tastaǵan emespin, deıdi ol.