Muqaǵalı Maqataevtyń uly ákesin «sorly erkekke» teńegen blogerden 10 mln talap etti

Muqaǵalıdy sorly erkek dep álemge jar salǵan Álisher Temenovtiń isi sotta qaralyp jatyr, dep jazady qandastar.kz

Blogerdiń ústinen Muqaǵalı Maqataevtyń uly Juldyz Maqataev shaǵym túsirgen, dep habarlaıdy Orda.kz.

Ol Temenovke qatysty Qylmystyq Kodekstiń 131-baby 2-tarmaǵy «Qorlaý» faktisi boıynsha qylmystyq is qozǵaýdy suraǵan. Qylmystyq isti Almatynyń Naýryzbaı aýdandyq sotynda sýdıa Beınegúl Qaısına qarady. Aqyry Almaty qalasynyń Naýryzbaı aýdandyq sotynda Muqaǵalıdy qorlaǵan bloger Álisher Temenovke qatysty sot bastaldy. Al Temenov advokat jaldamaq bolǵan, biraq áli tappapty. Sotqa resmı ókili Meıirman Shekeevpen birge keldi. Álisher Temenov sot zalynda jýrnalısterdiń beınege túsirýine qarsylyq bildirdi.
Blogerdiń resmı ókili sottaspaı-aq tatýlasýǵa kelip edik dedi sýdıaǵa.

«Bul eki kisi túptep kelgende týys. Bir atanyń balalary. Negizi Temenov óz áreketi úshin keshirim suraǵan. Múmkin sizden keshirim suramaǵan shyǵar. О́zim de qarsy bolǵanmyn. Biraq bizdiń kómekke júgingen soń, kómekteseıik dep sheshtik. Múmkin bolsa, sizden keshirim surasaq dep edik», — dedi blogerdiń resmı ókili Meıirman Shekeev Muqaǵalıdyń uly Juldyz Maqataevqa.
Sýdıa 10 mınýt úzilis jarııalap, eki tarapqa tatýlasýǵa múmkindik berdi.
«Men kúızeliske tústim, bizdiń atymyzǵa nuqsan keltirdi. Moraldyq shyǵyn keltirdi. 10 mln teńge moraldyq shyǵyn ótesin. Jelide keshirim surasyn. Ary qaraıǵysyn kóremiz», — dedi Juldyz Maqataev sotta.
Al blogerdiń resmı ókili kelisip kóremiz degendi aıtty.

Eske sala keteıik, byltyr 8 qazanda bloger Álisher Temenov áleýmettik jelide Muqaǵalı Maqataevty bylapyt sózdermen qorlap beınejazba jarııalady.
Alaıda bloger beınejazbalaryn óshirip úlgergen. Alaıda jurttyń ashýyna tıgen jazba lezde halyqqa tarap ketti. Muqaǵalıdyń jerlesteri bul qorlyqqa shydamaı, Temenovtiń úıine deıin baryp, izdeý salǵan. Artynan bloger men ákesin Muqaǵalıdyń týǵan jeri Qarasazǵa aparyp, halyqtan keshirim suratty.

Álisher Temenov — Almaty oblysy Uıǵyr aýdany Suńqar aýylynyń turǵyny. Ol sotta bir qyzy baryn jáne áıeliniń ekinshi balaǵa júkti ekenin aıtty. Turaqty jumysy joq, tek blogerlikpen aınalysady. Alǵash ret sottalyp jatyr.

Ol jýrnalısterge qandaı da bir ýáj aıtýdan bas tartty.

Al Muqaǵalıdyń balasy Juldyz Maqataev:

«Osy kúnge deıin aldyma kelip keshirim suramady. Kúızeliske tústim. Ákem Muqaǵalı aıtyp edi «balam, meni halyq jamandasyn, óıtkeni pendemin, biraq meniń shyǵarmalarymdy jamandaǵan adamdy keshirmeımin» dep. Temenov ne úshin bulaı aıtqanyn túsindirmedi, biraq ókinetinin aıtty», — dedi Juldyz Maqataev.