«مۇناي مەن گاز ىزدەپ, جەرىمىزدى لاستاماڭدار»: اقتوبە وبلىسىنداعى اۋىل تۇرعىندارى بارلاۋ جۇمىستارىنا قارسى شىقتى

فوتو: diapazon.kz

اقتوبە وبلىسىنداعى اۋىلدار ماڭىنداعى گەولوگيالىق بارلاۋ جۇمىستارىنا قاتىستى ءبىر جىلداعى ءتورتىنشى قوعامدىق تىڭداۋ جانجالمەن اياقتالدى. بۇل تۋرالى qandastar.kz اقپارات اگەنتتىگى دياپازون باسىلىمىنا سىلتەمە جاساپ حابارلايدى.

اقتوبە وبلىسىنداعى شامشى قالداياقوۆ جانە پەتروپاۆلوۆكا اۋىلدارى ماڭىندا مۇناي-گاز بارلاۋ جۇمىستارىن جۇرگىزۋ ءۇشىن ەنەرگەتيكا مينيسترلىگىنەن رۇقسات العان «كازنەفتەگازپروەكت» جشس بىلتىردان بەرى تۇرعىندارمەن كەلىسىمگە كەلە الماي ءجۇر. كومپانيا قوعامدىق تىڭداۋلارسىز جانە اۋىل تۇرعىندارىنىڭ كەلىسىمىنسىز بارلاۋ جۇمىستارىن باستاي المايدى.

باسىلىمنىڭ مالىمەتىنشە, اۋىلداردىڭ ماڭىنداعى مۇناي مەن گاز كوندەنساتى سوناۋ 1950 جىلدارى تابىلعان. بىراق كولەمى از بولعاندىقتان, ءوندىرۋ جۇمىستارى كەيىنگە قالدىرىلعان. وتكەن جىلى اۋماقتى قايتادان زەرتتەۋ تۋرالى شەشىم قابىلدانعان.

اۋىل تۇرعىندارى ەگەر شيكىزات تابىلسا, دەرەۋ وندىرىس باستالادى دەپ ۇرەيلەنىپ وتىر. تۇرعىنداردىڭ ايتۋىنشا, ولار مۇندا كارتوپ پەن كوكونىس ءوسىرىپ, شارۋا قوجالىقتارى مەن ەگىستىكتەرىنە كۇتىم جاسايدى. جاقىن جەردە قارعالا سۋ قويماسى بار. سەيسميكالىق بارلاۋعا بەرىلگەن كەلىسىمشارتتىق اۋماق 538,39 شارشى شاقىرىمدى قۇرايدى.

“گەولوگيالىق بارلاۋ ءوندىرىس ەمەس, ول جەلتوقسان مەن قاڭتار ايلارىندا 42 كۇنگە سوزىلادى, ول كەزدە اۋىلشارۋاشىلىق جۇمىستارى جۇرگىزىلمەيدى. ەشتەڭە تاپپاساق, جۇمىستىڭ ناتيجەسىن قازاقستان رەسپۋبليكاسىنىڭ گەولوگيالىق قورىنا وتكىزەمىز, سونىمەن ءبىتتى», – دەدى «كازنەفتەگازپروەكت» جشس ديرەكتورىنىڭ ورىنباسارى راسۋلبەك مايلىباەۆ.

ال اۋىل تۇرعىندارى كومپانيا وكىلدەرىنىڭ سوزىنە سەنبەيدى.

“گەولوگيالىق بارلاۋ جۇمىستارى جۇرگىزىلەتىن جەردەن قارعالى سۋ قويماسىنىڭ شەكاراسى نەبارى 1 شاقىرىمدى قۇرايدى. ولار جۇمىستى قىستا, جەر توڭىپ تۇرعاندا جۇرگىزگىسى كەلەدى. ال كوكتەمدە نە بولادى? بارلاۋ جۇمىستارىنان كەيىن بوگەتتىڭ جارىلىپ كەتپەيتىنىنە كەپىلدىك قايدا? كەڭەس زامانىنان بەرى ول جەردە جوندەۋ جۇمىستارى جۇرگىزىلمەگەن. سۋ قويماسىنىڭ اينالاسىندا كوپتەگەن بۇلاقتار بار. ولاردىڭ ءبارى قۇرعاپ, ەكى اۋىل عانا ەمەس, قالاعا دەيىنگى بارلىق اۋىلدار زارداپ شەگەدى. ءبىز 4-رەت ءتۇسىندىرىپ جاتىرمىز, بىزدەن ەشتەڭە ىزدەۋدىڭ قاجەتى جوق”, – دەيدى اۋىل تۇرعىنى جانات كەنجەعاليەۆ.

اۋىل جاستارىنىڭ ءبىرى ەگەر بارلاۋ جۇمىستارى باستالسا, جولدى جاۋىپ, تەحنيكالاردى قيراتاتىندارىن ايتتى.

“جاستار اتىنان سويلەۋگە رۇقسات ەتىڭىزدەر.ەگەر بارلاۋ باستالسا, جاستار تاس جولدى جاۋىپ, تەحنيكالاردى جويۋعا دايىن, ۇلكەن شۋ بولادى”, – دەدى زالداعى جاستاردىڭ ءبىرى.

تۇرعىندار جوبا تۋرالى ايتقىسى كەلگەن كومپانيا وكىلىنىڭ ءسوزىن تىڭداۋدان باس تارتقان.

“ميلليونداعان جىلعا جەتەتىن گاز بەن مۇناي قورى بولسا دا, حالىققا نە پايدا? ارابتار سياقتى ءومىر سۇرەمىز بە? جاڭاجول, ساركول, كەڭقياقتىڭ ەكولوگياسىنا قاراڭىز. اقتوبەدە 5 ايدان بەرى گاز جوق, حالىق كەزەكتە تۇر. مۇنداي گاز بىزگە نە ءۇشىن قاجەت? بىزدەن ەشتەڭە ىزدەۋدىڭ قاجەتى جوق, نەگە تۇسىنبەيسىزدەر? اۋىلداردى قورعاۋ ءۇشىن ءبىز سوڭىنا دەيىن بارامىز”, – دەيدى اۋىل تۇرعىندارىنىڭ ءبىرى.

ەسكە سالساق, بۇعان دەيىن الماتى وبلىسىندا مەكتەپ پەن مىڭنان اسا ءۇي ءسىبىر جاراسى بار اۋماققا كىرىپ كەتىپ, تۇرعىندار ءۇيسىز قالۋى مۇمكىن ەكەنى تۋرالى جازعان ەدىك.