«Munaı men gaz izdep, jerimizdi lastamańdar»: Aqtóbe oblysyndaǵy aýyl turǵyndary barlaý jumystaryna qarsy shyqty

Foto: diapazon.kz

Aqtóbe oblysyndaǵy aýyldar mańyndaǵy geologııalyq barlaý jumystaryna qatysty bir jyldaǵy tórtinshi qoǵamdyq tyńdaý janjalmen aıaqtaldy. Bul týraly qandastar.kz aqparat agenttigi Dıapazon basylymyna silteme jasap habarlaıdy.

Aqtóbe oblysyndaǵy Shámshi Qaldaıaqov jáne Petropavlovka aýyldary mańynda munaı-gaz barlaý jumystaryn júrgizý úshin energetıka mınıstrliginen ruqsat alǵan «KazNefteGazProekt» JShS byltyrdan beri turǵyndarmen kelisimge kele almaı júr. Kompanııa qoǵamdyq tyńdaýlarsyz jáne aýyl turǵyndarynyń kelisiminsiz barlaý jumystaryn bastaı almaıdy.

Basylymnyń málimetinshe, aýyldardyń mańyndaǵy munaı men gaz kondensaty sonaý 1950 jyldary tabylǵan. Biraq kólemi az bolǵandyqtan, óndirý jumystary keıinge qaldyrylǵan. О́tken jyly aýmaqty qaıtadan zertteý týraly sheshim qabyldanǵan.

Aýyl turǵyndary eger shıkizat tabylsa, dereý óndiris bastalady dep úreılenip otyr. Turǵyndardyń aıtýynsha, olar munda kartop pen kókónis ósirip, sharýa qojalyqtary men egistikterine kútim jasaıdy. Jaqyn jerde Qarǵala sý qoımasy bar. Seısmıkalyq barlaýǵa berilgen kelisimsharttyq aýmaq 538,39 sharshy shaqyrymdy quraıdy.

“Geologııalyq barlaý óndiris emes, ol jeltoqsan men qańtar aılarynda 42 kúnge sozylady, ol kezde aýylsharýashylyq jumystary júrgizilmeıdi. Eshteńe tappasaq, jumystyń nátıjesin Qazaqstan Respýblıkasynyń geologııalyq qoryna ótkizemiz, sonymen bitti», – dedi «KazNefteGazProekt» JShS dırektorynyń orynbasary Rasýlbek Maılybaev.

Al aýyl turǵyndary kompanııa ókilderiniń sózine senbeıdi.

“Geologııalyq barlaý jumystary júrgiziletin jerden Qarǵaly sý qoımasynyń shekarasy nebári 1 shaqyrymdy quraıdy. Olar jumysty qysta, jer tońyp turǵanda júrgizgisi keledi. Al kóktemde ne bolady? Barlaý jumystarynan keıin bógettiń jarylyp ketpeıtinine kepildik qaıda? Keńes zamanynan beri ol jerde jóndeý jumystary júrgizilmegen. Sý qoımasynyń aınalasynda kóptegen bulaqtar bar. Olardyń bári qurǵap, eki aýyl ǵana emes, qalaǵa deıingi barlyq aýyldar zardap shegedi. Biz 4-ret túsindirip jatyrmyz, bizden eshteńe izdeýdiń qajeti joq”, – deıdi aýyl turǵyny Janat Kenjeǵalıev.

Aýyl jastarynyń biri eger barlaý jumystary bastalsa, joldy jaýyp, tehnıkalardy qıratatyndaryn aıtty.

“Jastar atynan sóıleýge ruqsat etińizder.Eger barlaý bastalsa, jastar tas joldy jaýyp, tehnıkalardy joıýǵa daıyn, úlken shý bolady”, – dedi zaldaǵy jastardyń biri.

Turǵyndar joba týraly aıtqysy kelgen kompanııa ókiliniń sózin tyńdaýdan bas tartqan.

“Mıllıondaǵan jylǵa jetetin gaz ben munaı qory bolsa da, halyqqa ne paıda? Arabtar sııaqty ómir súremiz be? Jańajol, Sarkól, Keńqııaqtyń ekologııasyna qarańyz. Aqtóbede 5 aıdan beri gaz joq, halyq kezekte tur. Mundaı gaz bizge ne úshin qajet? Bizden eshteńe izdeýdiń qajeti joq, nege túsinbeısizder? Aýyldardy qorǵaý úshin biz sońyna deıin baramyz”, – deıdi aýyl turǵyndarynyń biri.

Eske salsaq, buǵan deıin Almaty oblysynda mektep pen myńnan asa úı sibir jarasy bar aýmaqqa kirip ketip, turǵyndar úısiz qalýy múmkin ekeni týraly jazǵan edik.