«مۇنايدىڭ ماڭايىندا عانا مالتىعىپ قالماڭىزدار». ماڭعىستاۋ اكىمى جاستارعا ءۇن قاتتى

ماڭعىستاۋ وبلىسىنىڭ اكىمى نۇرداۋلەت قيلىباي ءوڭىر جاستارىن اشىق اڭگىمەگە تارتىپ, ەڭبەك نارىعىنىڭ شىنايى بەت-بەينەسىن بوياماسىز باياندادى دەپ حابارلايدى  qandastar.kz     Ertenmedia-عا سىلتەمە جاساپ.

پرەزيدەنت توقاەۆتىڭ 2025 جىلدى «جۇمىسشى ماماندىق جىلى» دەپ جاريالاۋى بەكەر ەمەس ەكەنىن باسا ايتقان ايماق باسشىسى مۇنايدان باسقا دا باعىتتاردىڭ مول ەكەنىن تۇسپالداپ جەتكىزدى.

ءۇش ساعاتقا سوزىلعان اشىق ديالوگتا اكىم جاستاردىڭ مۇناي سالاسىنا عانا ءۇمىت ارتىپ, باسقا كاسىپكە قىرىن قاراۋى كەلەشەگىنە تۇساۋ بولارىن ءسوز اراسىنا سالماقتاپ قوستى.

«جاستاردىڭ كوپشىلىگى مۇناي سالاسىندا تابىس تاۋىپ, جۇمىس ىستەۋدى قالايدى. بىراق بۇل سالادا باسەكە كوپ, ورىن تاپشى. اقيقاتى تابىسقا جەتكەن تالاي ازاماتتار مانساپ جولىن مۇناي مۇناراسىنان ەمەس, قاراپايىم كاسىپتەن باستاعان.

تاباندى بولا بىلسەڭ, توزىمدىلىك پەن ادال ەڭبەكتىڭ ارقاسىندا قاي سالادان بولسا دا ءوز ورنىڭدى تابۋعا بولادى.

قازىر بىزدەگى كاسىپورىن مەن قۇرىلىستاردا كورشى ەلدەردەن كەلگەن مىڭداعان جۇمىسشى ەڭبەك ەتىپ ءجۇر. ولاردىڭ سانى وبلىستاعى جۇمىسسىزدار سانىنان الدەقايدا كوپ. بۇل دەگەنىمىز ەڭبەكتەن قاشپاساڭ, جۇمىس بار, ەكپىندەپ وسۋگە جول اشىق. سوندىقتان مۇنايدىڭ ماڭايىندا عانا مالتىعىپ قالماڭىزدار», – دەدى وبلىس اكىمى نۇرداۋلەت قيلىباي.

جيىنعا قاتىسقان 500-گە جۋىق جاس ۇسىنىسىن ورتاعا سالىپ, ءتۇرلى الەۋمەتتىك باستامالار مەن يدەيالارىن جەتكىزدى. نۇرداۋلەت قيلىباي ۇتىمدى جوبالاردى نازارعا الىپ, كەيبىرىن ناقتى قولدايتىنىن ءبىلدىردى.

قازىرگى تاڭدا وبلىستا 14 پەن 35 جاس ارالىعىنداعى 240 مىڭنان اسا جاس بار.

ولاردىڭ كاسىبي دامۋى مەن تۇلعالىق قالىپتاسۋى ءۇشىن 7 جاستار رەسۋرستىق ورتالىعى قىزمەت ەتەدى. سونداي-اق, ايماقتاعى 26 ءىرى كاسىپورىندا جاس مامانداردىڭ كەڭەسى قۇرىلعان.

اكىمدىك مۇنايدان وزگە سالالاردى يگەرىپ, ەڭبەك ەتىپ جاتقان جاستاردى قولداۋ ءىسىن جانداندىراتىنىن مالىمدەپ وتىر.