«Munaıdyń mańaıynda ǵana maltyǵyp qalmańyzdar». Mańǵystaý ákimi jastarǵa ún qatty

Mańǵystaý oblysynyń ákimi Nurdáýlet Qılybaı óńir jastaryn ashyq áńgimege tartyp, eńbek naryǵynyń shynaıy bet-beınesin boıamasyz baıandady dep habarlaıdy  qandastar.kz     Ertenmedia-ǵa silteme jasap.

Prezıdent Toqaevtyń 2025 jyldy «Jumysshy mamandyq jyly» dep jarııalaýy beker emes ekenin basa aıtqan aımaq basshysy munaıdan basqa da baǵyttardyń mol ekenin tuspaldap jetkizdi.

Úsh saǵatqa sozylǵan ashyq dıalogta ákim jastardyń munaı salasyna ǵana úmit artyp, basqa kásipke qyryn qaraýy keleshegine tusaý bolaryn sóz arasyna salmaqtap qosty.

«Jastardyń kópshiligi munaı salasynda tabys taýyp, jumys isteýdi qalaıdy. Biraq bul salada báseke kóp, oryn tapshy. Aqıqaty tabysqa jetken talaı azamattar mansap jolyn munaı munarasynan emes, qarapaıym kásipten bastaǵan.

Tabandy bola bilseń, tózimdilik pen adal eńbektiń arqasynda qaı saladan bolsa da óz ornyńdy tabýǵa bolady.

Qazir bizdegi kásiporyn men qurylystarda kórshi elderden kelgen myńdaǵan jumysshy eńbek etip júr. Olardyń sany oblystaǵy jumyssyzdar sanynan áldeqaıda kóp. Bul degenimiz eńbekten qashpasań, jumys bar, ekpindep ósýge jol ashyq. Sondyqtan munaıdyń mańaıynda ǵana maltyǵyp qalmańyzdar», – dedi oblys ákimi Nurdáýlet Qılybaı.

Jıynǵa qatysqan 500-ge jýyq jas usynysyn ortaǵa salyp, túrli áleýmettik bastamalar men ıdeıalaryn jetkizdi. Nurdáýlet Qılybaı utymdy jobalardy nazarǵa alyp, keıbirin naqty qoldaıtynyn bildirdi.

Qazirgi tańda oblysta 14 pen 35 jas aralyǵyndaǵy 240 myńnan asa jas bar.

Olardyń kásibı damýy men tulǵalyq qalyptasýy úshin 7 jastar resýrstyq ortalyǵy qyzmet etedi. Sondaı-aq, aımaqtaǵy 26 iri kásiporynda jas mamandardyń keńesi qurylǵan.

Ákimdik munaıdan ózge salalardy ıgerip, eńbek etip jatqan jastardy qoldaý isin jandandyratynyn málimdep otyr.