مۇنايلى اۋدانىندا شاعىن جانە ورتا كاسىپ قارقىندى دامىپ جاتىر

ماڭعىستاۋدىڭ مۇنايلى اۋدانىندا شاعىن جانە ورتا كاسىپ قارقىندى دامىپ جاتىر. بيىل كاسىپكەرلىك سۋبەكت سانى 10 پايىزعا كوبەيىپ, 10 700-گە جەتكەن. اۋداندا جەڭىل ونەركاسىپ, مال شارۋاشىلىعى, دۇكەندەر جەلىسى, قىزمەت كورسەتۋ سالالارى قانات جايعان.

اۋداندا تىگىن تسەحىنىڭ اشىلعانىنا 2 جىل بولدى. كاسىپورىن 50 ادامدى تۇراقتى جۇمىسپەن قامتىپ وتىر. مۇندا ايىنا 2 مىڭعا جۋىق ارنايى كيىم تىگىلەدى. جۇمىسشىلاردىڭ بارلىعى اۋدان تۇرعىندارى. سولاردىڭ ءبىرى — اقسىرعا تاجىقوسوۆا. 57 جاستاعى ايەل جۇمىستاستارىمەن بىرگە كۇنىنە 50-60 كۇرتەشە تىگەدى.

اقسىرعا تاجىقوسوۆا, باتىر اۋىلىنىڭ تۇرعىنى:

اۋىلىمىزدا وسىنداي مەكەمە اشىلىپ جاتقانىنا, جاساپ جاتقانىمىزعا راحمەت, قۋانامىز. كەلەمىز, جۇمىسىمىزدى جاسايمىز. وتىرعان جەرىمىز جىلى جەر, وبەدىمىز دايىن. اقشامىزدى تاپقانىمىزشا تابامىز. 250 مىڭ مەن 150 مىڭنىڭ ارالىعىندا اقشا تابامىز.
ماتراس تسەحى – اۋداندا مەملەكەتتىك باعدارلامالاردىڭ ارقاسىندا اياققا تۇرعان كاسىپورىنداردىڭ ءبىرى. ايىنا 1 مىڭعا جۋىق ورتوپەديالىق ماتراستىڭ ءتۇر-ءتۇرىن وندىرەدى. مۇندا مۇناي كومپانيالارى, جيھاز دۇكەندەرى تاپسىرىس بەرەدى. ەسحات قايرات ۇلى ورتوپەديالىق ماتراس جاسايتىن مامان. ول تسەحتا 5 جىلدان بەرى جۇمىس ىستەيدى.

ەسحات قايرات ۇلى, مۇنايلى اۋدانىنىڭ تۇرعىنى:

مەنىڭ مىندەتىم – نەگىزگى وسى ورتوپەديالىق ماتراستاردى قۇراستىرىپ جاساۋ. كوكوس, پارالون ورتاسىندا, ەمبى پرۋجينا دەگەن زاتتار بار. پارالوندار بار ءار ءتۇرلى نارسەلەردى ءبىر-بىرىنە كلەي ارقىلى بەكىتىلەدى, سولاي جاسالاتىن نارسە.
اۋداندا بۇدان بولەك, دۇكەندەر جەلىسى, مال شارۋاشىلىعى, قىزمەت كورسەتۋ سالاسى جانە تۋريزم باعىتىنداعى جوبالار دامىپ كەلەدى. بۇگىندە شاعىن جانە ورتا كاسىپكەرلىك سۋبەكتىلەرىنىڭ سانى 10700-گە جەتتى. ولار 17 مىڭنان استام تۇرعىندى جۇمىسپەن قامتىپ وتىر.

بەكبولات قاباتباەۆ, مۇنايلى اۋداندىق كاسىپكەرلىك جانە اۋىل شارۋاشىلىعى ءبولىمى باسشىسىنىڭ ورىنباسارى:

بىردەن-ءبىر سەبەپ كاسىپكەرلىكتىڭ دامۋى — ءبىزدىڭ اقتاۋ قالاسىنا جاقىن ورنالاسۋىنا وراي اۋدانىمىز جانە دە مەملەكەتتىك قولداۋلار. اۋدان تۇرعىندارىنا 6 پايىزبەن نەسيە, كوپ بالالى انالارعا جەڭىلدىك قاراستىرىلعان 4 پايىزبەن جانە اگرارلىق نەسيە كورپوراتسياسى ارقىلى جاستار نەسيەسى 2,5 پايىزبەن نەسيەلەر بەرىلىپ وتىر.
اۋداندا بىلتىردان بەرى اۋىل شارۋاشىلىعى باعىتىندا جوبالار كوپ قارجىلاندىرىلۋدا. سونداي-اق, جۇمىسسىزدارعا ارنالعان «اۋىل اماناتى» پيلوتتىق جوباسى باستالعان. ونىڭ اياسىندا 36 جوباعا 2,5 پايىزدىق نەسيە بەرىلدى.