«مۇنداي اقشام بولسا قازاقساندا ءجۇرىپ نەم بار?»: سالىق «تولەمەگەندەردىڭ» تىزىمىندەگى قازاقستاندىقتار

ەستەرىڭىزدە بولسا, تۋعان كۇنىمدە ەشقانداي سىيلىق قابىلداماي, “مۇمكىندىگى شەكتەۋلى بالالارعا ارنالعان وڭالتۋ ورتالىعىنا كومەكتەسەيىك” دەگەن باستاما كوتەردىم. سول كەزدە 77 ميلليون تەڭگە جينالىپ, ونىڭ ۇستىنە ءوز قاراجاتىمنان قوماقتى ۇلەس قوسىپ, ورتالىققا بەردىك. قازىرگى كۇنگە دەيىن سول ورتالىقتىڭ شىعىنىن ءوز موينىما الىپ كەلەمىن. بۇگىندە اي سايىن 300-دەن استام بالا تەگىن ەمدەلەدى. ەگەر بانكتىك كارتالارعا تۇسكەن قاراجاتتاردى وسىلاي سالىق ەسەبىنە ەنگىزەتىن بولسا, وندا ءاربىر قازاقستان ازاماتىنىڭ كارتاسى تەكسەرىلۋى مۇمكىن. بۇل جاعداي ءسىزدىڭ دە باسىڭىزعا ءتۇسۋى عاجاپ ەمەس, سول سەبەپتى كىرىس-شىعىسىڭىزدى ەسەپتەپ جۇرگەنىڭىز ابزال. مەن جارناما ارقىلى اقشا تاپقان ەمەسپىن! قۇدايعا شۇكىر, ءوز كاسىبىم بار, تابىسىم وزىمە جەتكىلىكتى ازاماتپىن, دەيدى كاسىپكەر.

بۇل جايتقا قاتىستى بەلگىلى قوعام قايراتكەرى, ساياساتكەر مۇحتار تايجان دا پىكىر ءبىلدىردى. ول سالىق قىزمەتكەرلەرىنە جۇگىنىپ, نە ءۇشىن بلوگەرلەردىڭ تىزىمىندە جۇرگەنىن سۇراعان. ولار, ءوز كەزەگىندە, تايجاننىڭ Facebook, Instagram پاراقشالارىندا جانە YouTube-ارناسىندا وقىرمان كوپ بولعاندىقتان بلوگەرلەر تىزىمىنە قوسىپ قويعان.

«سالىق قىزمەتكەرلەرى مەنى زاڭسىز جارنامامەن اينالىستى دەپ كۇدىكتەنىپ, ول بويىنشا سالىق تولەمەدى دەپ ويلاپ, مەنىڭ بارلىق جەكە بانك كارتالارىمنان بارلىق قولما-قول اقشا وپەراتسيالارىن سۇرادى. مەنىڭ اقشا اينالىمىما قول جەتكىزىپ, سالىق قىزمەتكەرلەرى ونىڭ ءبارى جارنامانىڭ اقشاسى دەپ ويلاعان. بىراق ونىڭ ىشىندە زاڭدى تۇلعالاردان بىردە-ءبىر اقشا تۇسپەگەن. ءبارى جەكە اۋدارىمدار – وتباسىلىق اۋدارىمدار, باسقا بانكتەگى شوتتارىمنان, ءوز دەپوزيتتەرىمنەن, بانكوماتتاردان قولما-قول اقشانى تولتىرۋ جانە ت.ب. سالىق ورگاندارى مۇنىڭ بارلىعىن جارناما ءۇشىن سالىق سالىناتىن تابىس رەتىندە ەسەپكە العان.

P.S: ءدال وسىنداي قۇلشىنىسپەن سالىق قىزمەتكەرلەرى ازاتتىق تىلشىلەرى انىقتاعان بىرىككەن اراب امىرلىكتەرىندە ەليتالى ۇيلەرى بار ەكەنى انىقتالعان شەنەۋنىكتەر, سۋديا, بانكروت بولىپ جاتقان ۇلتتىق كومپانيالاردىڭ باسشىلارىن تەكسەرسە جاقسى بولار ەدى», دەيدى تايجان.

سونىمەن قاتار, الەۋمەتتىك جازبالاردىڭ بىرىندە بەلگىلى بلوگەر وركەن كەنجەبەك تە تىزىمدە جۇرۋىنە قاتىستى پىكىر بىلدىرگەن.

«اينالامداعى بار اقشانى ەسەپكە العان-اۋ. مۇنداي اقشام بولسا قازاقساندا ءجۇرىپ نەم بار?» دەيدى بلوگەر.