مۇرات باقتيار ۇلى: داريعا نازارباەۆا مىقتى سەنات سپيكەرى بولدى

فوتو: اشىق دەرەككوز

مەملەكەت جانە قوعام قايراتكەرى مۇرات باقتيار ۇلى Adal Adam YouTube ارناسىنا بەرگەن سۇحباتىندا سەناتتىڭ ەكس-توراعاسى داريعا نازارباەۆانى “مىقتى سپيكەر بولدى” دەپ ماقتادى, دەپ جازادى qandastar.kz

«مەن داريعا نۇرسۇلتانقىزىنىڭ قاراماعىندا ءبىر جارىم جىل قويىن-قولتىق جۇمىس ىستەدىم. جۇرت اناۋ دەسىن, مىناۋ دەسىن, ول مىقتى سەنات سپيكەرلەرىنىڭ ءبىرى بولدى, ونى اشىق ايتا الامىن. وعان پىكىرىمدى اشىق ايتاتىنمىن. ول كىسىنىڭ ەسىگى اشىق بولدى ءار ۋاقىتتا, كىرىپ-شىعۋ وڭاي بولدى. داريعا نۇرسۇلتانقىزىن سپيكەر رەتىندە قاتتى باعالايمىن. بۇل سۋبەكتيۆتى پىكىرىم» — دەدى مۇرات باقتيار ۇلى.

سونداي-اق ەكس-سەناتور داريعا نازارباەۆاعا ايتىلاتىن سىندارعا قاتىستى ويىن ءبىلدىردى.

«ول دا ادام, تراگەديالىق وتباسى. بالاسىنىڭ ءولۋى, ونىڭ اۋرۋعا ۇشىراۋى, قايتىس بولۋى — تراگەديا. مەنىڭ دە بالالارىم بار, وعان تۇسىنىستىكپەن قارايمىن. ال بايلىعىنا قاتىستى اڭگىمەلەرگە كەلسەك, ول مەنىڭ قۇزىرەتىمە جاتپايدى, ارنايى ورگاندار شەشەر. ال بىراق ادام رەتىندە, سپيكەر رەتىندە, سول كەزدەگى سەناتورلاردىڭ كوپشىلىگىنەن سۇراڭىز, داريعا نۇرسۇلتانقىزى تۋرالى ءبىر اۋىز جامان ءسوز ايتا المايدى. ويتكەنى ول اشىق سپيكەر بولدى, تۇسىنىستىكپەن قارايتىن سپيكەر بولدى, كەيبىر نارسەلەردى تۇبىنە دەيىن قارايدى. زاڭ جوبالارى قارالعاندا فەرمەرلەردى ءسوزىن بىلمەي ساعاتتاپ وتىرىپ تىڭدايتىن. مەن ءۇشىن داريعا نۇرسۇلتانقىزى قاراپايىم بولدى», — دەدى ەكس-سەناتور.