«مۇشەسىن كورسەتكەن»: اقتاۋدا جىگىت ليفتتە ەكى ءجاسوسپىرىم قىزعا شابۋىل جاسادى

اقتاۋدا 17 جاستاعى جىگىت ۇيلەردىڭ بىرىندەگى ليفتكە كىرگەن ەكى قىزعا شابۋىل جاساعان, دەپ حابارلايدى qandastar.kz Stan.kz-كە سىلتەمە جاساپ.

«نەمولچي» قورىنىڭ اقپاراتىنا سايكەس, 11 قازان كۇنى تۇرعىن ءۇيدىڭ كىرە بەرىسىندە بولعان جاعداي تۋرالى قىزداردىڭ اناسى ايتىپ بەردى.

“13 جاستاعى ۇلكەن قىز ەرەكشە ءتۇستى ارقاعا ىلەتىن سومكەسى بار جىگىتتى بىردەن بايقاعان. ونى بۇرىن-سوڭدى كورمەگەن دە. ول پودەزگە قىزداردان ءبىرىنشى كىرىپ كەتىپ, ولاردى ۇيگە كىرە بەرىس جەردە كۇتىپ تۇرعان. قىزدار ليفتكە كىرگەن سوڭ, ول دا سوڭىنان كىرگەن. جەدەلساتىنىڭ ىشىندە قىزدارعا مۇشەسىن كورسەتىپ, ولارعا قول جۇگىرتە باستاعان”, – دەلىنگەن جازبادا.

ءجاسوسپىرىم مۇنى كورىپ قورىققاننان ءبىر ورىندا تۇرىپ, سويلەي الماعان. 5 جاستاعى ءسىڭلىسىنىڭ شوشىعان ءجۇزىن كورگەندە عانا “قاش” دەپ ايعايلاعان. ءسويتىپ ولار سىرتقا قاشىپ شىعىپ, بولعان جاعدايدى اناسىنا حابارلاسىپ, ايتىپ بەرگەن.

ايەل ەكى قىزىن الىپ ۋچاسكەلىك پوليتسياعا بارعان. سول كۇنى بولعان جاعداي بەينەكامەراعا جازىلعان ەكەن. 12 قازان كۇنى جىگىت ءوزىنىڭ سول جەردە بولعانىن مويىنداعانىمەن, مۇنداي ارەكەتكە بارماعانىن ايتتى.

قىزداردىڭ اناسى پوليتسياعا شاعىم ءتۇسىردى. ونىڭ ايتۋىنشا, ايەل كۇدىكتىنى 16 قازان كۇنى كورگەن. سونداي-اق جىگىتىڭ جاقىندارى ءزابىر كورگەن قىزداردىڭ اناسىنا كەلىپ, شاعىمىن قايتارىپ الۋىن سۇراعان. بولعان جاعدايعا قاتىستى ماڭعىستاۋ وبلىسىنىڭ پوليتسيا دەپارتامەنتى وقيعانى راستادى.

“كامەلەتكە تولماعان كۇدىكتى ۇستالىپ, پوليتسياعا جەتكىزىلدى. سەكسۋالدىق سيپاتتاعى ارەكەتتەرگە قاتىستى قىلمىستىق ءىس قوزعالدى. قازىر وقيعانىڭ ءمان-جايىن انىقتاۋ ءۇشىن جەدەل-ىزدەستىرۋ شارالارىن جۇرگىزىپ جاتىرمىز”, – دەپ مالىمدەدى وبلىستىق پوليتسيا.