«مۇسىلماندار – شوشقالار»: جەلىدە پىكىر جازعان قاراعاندىلىقتىڭ باسى داۋعا قالدى

قاراعاندىدا الەۋمەتتىك جەلىدە مۇسىلمانداردى «شوشقا» دەپ قورلاپ, قازاقتاردى كەمسىتكەن كاسىپكەر اليكا مۇحاماديەۆا ۋاقىتشا ۇستاۋ يزولياتورىنا قامالدى. وعان قىلمىستىق كودەكستىڭ 174-بابى 1-بولىگى بويىنشا «ۇلتارالىق ارازدىقتى قوزدىرۋ» بابى بويىنشا ايىپ تاعىلىپ وتىر, دەپ حابارلايدى Qandastar.kz Skifnews.kz اقپارات پورتالىنا سىلتەمە جاساپ.

سوڭعى كۇندەرى ونىڭ Threads جەلىسىندەگى پىكىرلەرى قوعامدى ءدۇر سىلكىندىردى. قازاقتاردى «مامبەت», «قالبيت», «قازاقشاسويلەشنيك» دەپ اتاعان ول, مۇسىلمانداردى «شوشقا» دەپ كەمسىتكەن. بۇل سوزدەر جۇرتتىڭ اشۋىن تۋدىرىپ, الەۋمەتتىك جەلىدە ۇلكەن رەزونانسقا اينالدى.

قاتتى قىسىمعا ۇشىراعان مۇحاماديەۆا Threads-تەگى پاراقشاسىن ءوشىرىپ, Instagram-دا كەشىرىم سۇراپ ۆيدەو جاريالادى. «مەن قاتتى وكىنەمىن», — دەپ اقتالعانىمەن, جۇرت ونى كەشىرمەدى. بۇگىن ءتارتىپ ساقشىلارى ونى ۇستاپ, ۋاقىتشا يزولياتورعا قامادى.

قازىر وعان قاتىستى بۇلتارتپاۋ شاراسى ءالى بەلگىلەنگەن جوق.

ايتا كەتەيىك, قازاقستاندا ۇلتارالىق جانە ءدىني ارازدىقتى قوزدىرۋ قىلمىستىق كودەكستىڭ 174-بابى بويىنشا جازالانادى. بۇل باپ بويىنشا ايىپتالۋشىعا ايىپپۇل سالىنۋى, بوستاندىعىن شەكتەۋ نەمەسە جەتى جىلعا دەيىن تۇرمەگە جابۋ جازاسى قاراستىرىلعان.

ەسكە سالساق, بيىل مامىر ايىندا سولتۇستىك قازاقستان وبلىسىندا جانسۇلۋ دارحامباەۆا دا ءدال وسى باپ بويىنشا كىنالى دەپ تانىلىپ, ەكى جىلعا باس بوستاندىعىنان ايىرىلعان ەدى.