«Musylmandar – shoshqalar»: Jelide pikir jazǵan qaraǵandylyqtyń basy daýǵa qaldy

Qaraǵandyda áleýmettik jelide musylmandardy «shoshqa» dep qorlap, qazaqtardy kemsitken kásipker Alıka Muhamadıeva ýaqytsha ustaý ızolıatoryna qamaldy. Oǵan Qylmystyq kodekstiń 174-baby 1-bóligi boıynsha «ultaralyq arazdyqty qozdyrý» baby boıynsha aıyp taǵylyp otyr, dep habarlaıdy Qandastar.kz Skifnews.kz aqparat portalyna silteme jasap.

Sońǵy kúnderi onyń Threads jelisindegi pikirleri qoǵamdy dúr silkindirdi. Qazaqtardy «mambet», «qalbıt», «qazaqshasóıleshnık» dep ataǵan ol, musylmandardy «shoshqa» dep kemsitken. Bul sózder jurttyń ashýyn týdyryp, áleýmettik jelide úlken rezonansqa aınaldy.

Qatty qysymǵa ushyraǵan Muhamadıeva Threads-tegi paraqshasyn óshirip, Instagram-da keshirim surap vıdeo jarııalady. «Men qatty ókinemin», — dep aqtalǵanymen, jurt ony keshirmedi. Búgin tártip saqshylary ony ustap, ýaqytsha ızolıatorǵa qamady.

Qazir oǵan qatysty bultartpaý sharasy áli belgilengen joq.

Aıta keteıik, Qazaqstanda ultaralyq jáne dinı arazdyqty qozdyrý Qylmystyq kodekstiń 174-baby boıynsha jazalanady. Bul bap boıynsha aıyptalýshyǵa aıyppul salynýy, bostandyǵyn shekteý nemese jeti jylǵa deıin túrmege jabý jazasy qarastyrylǵan.

Eske salsaq, bıyl mamyr aıynda Soltústik Qazaqstan oblysynda Jansulý Darhambaeva da dál osy bap boıynsha kináli dep tanylyp, eki jylǵa bas bostandyǵynan aıyrylǵan edi.