«ناعىز زاكازدىڭ تورەسى جاقسىبەك كۇلەكەەۆتىڭ ءىسى» – قايرات كوپباەۆ

فوتو: اشىق دەرەككوز

قورعانىس مينيسترلىگى كادر دەپارتامەنتىنىڭ ەكس-باسشىسى, بۇرىنعى گەنەرال-مايور قايرات كوپباەۆ 100 مىڭ دوللار پارا الدى دەگەن ايىپپەن جازىقسىز ءىستى بولعان مەملەكەت جانە قوعام قايراتكەرى جاقسىبەك كۇلەكەەۆتىڭ ىسىنە قاتىستى Adal Adam Youtube ارناسىنا بۇرىن ايتىلماعان شىندىقتى ايتتى, – دەپ حابارلايدى qandastar.kz

«مەن ول كۇندى ەسىمدە ساقتاپ قالدىم. بۇل وقيعا 2008 جىلدىڭ ءبىرىنشى ساۋىرىندە بولدى. جاقسىبەك قۇلەكەەۆتىڭ ءىسىن جۇرگىزگەن تەرگەۋ توبىندا بولدىم. بىراق ۇستار الدىندا 3-4 كولىكپەن بارا جاتتىق. سارىارقا كوپىرىنەن ءوتىپ بارا جاتقاندا مەنى جەدەل ىستەر بويىنشا باسقا جاققا جىبەردى. ەكى-ءۇش ساعاتتان كەيىن ورالسام, قاراسام, ىشتە جاقسىبەك قۇلەكەەۆ وتىر ەكەن. ونى تەرگەگەن تەرگەۋشى ەكەۋمىز باسىندا بىرگە جۇردىك, ويتكەنى ەڭ ءبىرىنشى كۇنى تەرگەۋ امالدارىن جەدەل تۇردە وتكىزۋ كەرەك. سول تەرگەۋ جۇمىستارىندا كۋاگەرلەردەن جاۋاپ الىپ, بىرگە وتكىزگەنبىز. بىراق قۇلەكەەۆتى باسقا تەرگەۋشى تەرگەدى. بۇل ءىستىڭ قالاي بولعانىن مەن بىلەمىن. مەنىڭ ەستۋىمشە, ول قاڭتار وقيعاسىنىڭ الدىڭدا 10 شاقتى كۇن بۇرىن اقتالدى. نەگىزى ول قوزعالاتىن ءىس ەمەس ەدى. ناعىز «زاكازدىڭ» تورەسى وسى جاقسىبەك قۇلەكەەۆتىڭ ءىسى. مەن ول ءىستى جۇرگىزگەن جوقپىن. بىراق, تاريحىن ءبارىن باستان-اياق بىلەمىن. ونى ءبىز ءاۋ باستا سوتقا جولداناتىنىن جانە ول كىسىنىڭ سوتتالاتىنىن بىلەتىنبىز. ويتكەنى تاپسىرما سونداي بولدى», – دەيدى بۇرىنعى گەنەرال-مايور.

قايرات كوپباەۆتىڭ ايتۋىنشا, جاقسىبەك قۇلەكەەۆ جازىقسىز سوتتالدى.

«تۇرمەدە بۇرىن قۇقىق قورعاۋ سالاسىندا قىزمەت ەتكەن ازاماتتاردى بولەك جەكە قاپاستا ۇستايدى. مەنىمەن بىرگە 7 اسكەري شەنى جوعارى ادام وتىردى. سولار ءسوزىمدى دالەلدەپ تە بەرە الادى. «وسى ومىردە 2 ادام كىناسىز سوتتالدى. ءبىرىنشىسى – جاقسىبەك قۇلەكەەۆ, ەكىنشىسى – ۆيتسە-ادميرال جانداربەك جانۇزاقوۆ» دەپ ايتقانمىن سول ۋاقىتتا. بۇل 2020 جىل ەدى. جاقسىبەك قۇلەكەەۆتىڭ اقتالماعان كەزى. ويتكەنى مەن ول ءىستىڭ تاريحىن, باستى ينيتسياتورى كىم ەكەنىن, زاكازچيگى كىم ەكەنىن, قانشا سۋمما بولعانىن بىلەمىن. بىراق اتىن اتاي المايمىن. سۇحباتتان كەيىن وزىڭە قۇلاعىڭا سىبىرلاپ ايتا الام», – دەدى قايرات كوپباەۆ.

ايتا كەتەيىك, قورعانىس مينيسترلىگى كادر دەپارتامەنتىنىڭ بۇرىنعى باستىعى گەنەرال-مايور قايرات كوپباەۆ 2020 جىلى پارا العانى ءۇشىن سوتتالعان بولاتىن. الايدا ول ۇكىممەن كەلىسكەن جوق. بۇگىندە كىناسىزدىگىن دالەلدەۋ جولىندا ىزدەنىپ ءجۇر.