«ناننىڭ باعاسى 50 تەڭگە بولۋى كەرەك» – الماسبەك سادىرباي

فوتو: اشىق دەرەككوز

«شاڭىراق» ۇلتتىق اگرو-قوزعالىسى» رقب توراعاسى الماسبەك سادىرباي Adal ADAM youtube ارناسىنا بەرگەن سۇحباتىندا قازاقستاندا ۇن مەن نان نەگە قىمباتتاعانىن ءتۇسىندىردى, دەپ حابارلايدى qandastar.kz

«اۋىل شارۋاشىلىعىنا اسىلجان مامىتبەكوۆ مينيستر بولعاننان كەيىن قازاقستاندا ۇن ءوندىرىسى قۇلدىراي باستادى. نەگە? سەبەبى اقىلبەك كۇرىشباەۆ, احمەتجان ەسىموۆتەن كەيىن كەلگەن مينيسترلەر ديىرمەندەردىڭ سانىن ازايتتى. ەلىمىزدە 1800 ديىرمەن بولدى, بۇگىنگى كۇنى قازاقستاندا قالعانى, ناقتى جۇمىس ىستەپ تۇرعانى – 40 ديىرمەن. 40 ديىرمەننىڭ قوجايىندارى ءبىر-بىرىمەن اۋىز جالاسىپ ىمىراعا كەلىپ وتىر. ۇننىڭ باعاسىن تۇسىرمەيمىز دەپ.

مەندە قاراپايىم سۇراق, ايتىڭىزدارشى, بيدايدىڭ باعاسى بۇگىندە 50 تەڭگە بولعاندا, ۇننىڭ باعاسى قانشا بولۋى كەرەك? ۇننىڭ باعاسى 100 تەڭگە بولۋى كەرەك. ال ناننىڭ سالماعى 600 گرامم بولسا, ناننىڭ باعاسى شامامەن 65 تەڭگە بولۋى كەرەك ارى كەتكەندە. وعان قوسا, نان پىسىرگەنى ءۇشىن ناۋبايحانالارعا ۇكىمەت سۋبسيديالاپ جاتىر. وسىنى ەسكەرسەك, بۇگىنگى كۇنى ناننىڭ باعاسى 50 تەڭگە بولۋى كەرەك. قاراپايىم اريفمەتيكا. ال قازىر 100 تەڭگەدەن كەم نان تاپپايسىز. نەگە ۇن ارزان ەمەس? ويتكەنى 40 قانا ديىرمەن قالدى, سولار كەلىسىم قىمبات كۇيىندە ۇستاپ وتىر. دەمەك 40 ديىرمەن كىشكەنتاي ديىرمەن ەمەس, ولار الپاۋىت ديىرمەندەر, ولار اگرو وليگارحتاردىڭ ديىرمەندەرى. بۇلار كىشكەنتاي ديىرمەندەردى تۇنشىقتىرىپ, جاۋىپ تاستاعان. وسى وليگارحتاردىڭ بارلىعى بۇگىنگى اۋىل شارۋاشىلىعى ءمينيسترىنىڭ توڭىرەگىنە جينالعان», – دەيدى الماسبەك سادىرباي.