«ءناپسىنى سۇيمەگىنىم – ءسىزدىڭ تاربيەڭىز»: تامارا اسار مارقۇم اعاسىن ەسىنە الىپ, اسەرلى جازبا جاريالادى

ءانشى تامارا اسار جەلىدەگى پاراقشاسىندا اسەرلى جازبا قالدىرىپ, مارقۇم اعاسى جاقسىلىق جانعازيەۆ جايلى ەستەلىگىن ءبولىستى, دەپ جازدى Qandastar.kz

«ادال دا ادىلەتتى, جان-جاعىنان جاقسىلىعىن اياماعان جاقسىلىق دەگەن اعام وسىدان قىرىق كۇن بۇرىن ومىردەن ءوتتى. وردەندى مۇنايشى, ىسكەر باسشى, جەر انانىڭ باۋىرىندا جانتالاسا تىرلىك كەشكەن, پەندە اتاۋلىنىڭ اراسىندا, بۇكىل بولمىس ءبىتىمى وزگەشە جاراتىلعان, دارا تۇلعا, كوش باستايتىن كەمەڭگەر,قول باستايتىن باتىر, اقىل-ويعا ءورىس جاسايتىن مەن ءۇشىن عۇلاما جاقسىلىق جانعازيەۆ قوعام قايراتكەرى, قازاقستان مۇناي سالاسىنا ەڭبەگى سىڭگەن مۇنايشى!  مەنى ۇلكەن ومىرگە تاربيەلەگەن سۇيىكتى اعام, جاناشىرىم. مەن ءسىزدى قاتتى جاقسى كوردىم. اتىڭىزعا كىر كەلتىرمەيمىن دەپ جۇرگەندە تۇلعا بولىپ قالىپتاسقانىمدى دا بايقاماي قالدىم. سول ءۇشىن باس يەم الدىڭىزدا. مەنىڭ بارلىق جەكە كونتسەرتتەرىمنىڭ ءجۇرۋ بارىسىن, ۇيىمداستىرۋىن, ستسەناريلەرىن اۋەلى وسى كىسى كورەدى, رۇقساتىن بەرىپ, بەكىتكەننەن كەيىن عانا جۇمىس باستالاتىن. سىرتتان ماعان جەتەكشىلىك ەتەتىن. ايتقان سوزدەرىمدى, وتكىزگەن شارالارىمنىڭ ەسكەرتۋلەرىمەن ماقتاۋلارىن ءوز اكە-شەشەمنەن كەيىن وسى كىسىمەن ۇيىندەگى جۇماعايشا جەڭگەمنەن كۇتەتىنمىن… قيسىق جۇرمەگەنىم, جامانعا ەرمەگەنىم, قارقىلداپ كۇلمەگەنىم, قىسقا كيمەگەنىم, ءناپسىنى سۇيمەگىنىم, ءبوسىپ سويلەمەگەنىم ءبارى سىزدەردەن كورگەن ونەگەم مەن تاربيەم, اعا. جالى بيىك ازاماتتى, جانى جىلى جاماعات بولىپ, شىعارىپ سالدىق. لايىمدا ەلگە جاساعان جاقسىلىعىڭىز ۇرپاعىڭىزعا قايتسىن. جانىڭىز ءجانناتتا بولسىن جاقسىلىق اعا», — دەپ جازدى ءانشى.