«Nápsini súımeginim – sizdiń tárbıeńiz»: Tamara Asar marqum aǵasyn esine alyp, áserli jazba jarııalady

Ánshi Tamara Asar jelidegi paraqshasynda áserli jazba qaldyryp, marqum aǵasy Jaqsylyq Janǵazıev jaıly esteligin bólisti, dep jazdy Qandastar.kz

«Adal da ádiletti, jan-jaǵynan jaqsylyǵyn aıamaǵan Jaqsylyq degen aǵam osydan qyryq kún buryn ómirden ótti. Ordendi munaıshy, isker basshy, jer ananyń baýyrynda jantalasa tirlik keshken, pende ataýlynyń arasynda, búkil bolmys bitimi ózgeshe jaratylǵan, dara tulǵa, kósh bastaıtyn kemeńger,qol bastaıtyn batyr, aqyl-oıǵa óris jasaıtyn men úshin ǵulama Jaqsylyq Janǵazıev qoǵam qaıratkeri, Qazaqstan munaı salasyna eńbegi sińgen munaıshy!  Meni úlken ómirge tárbıelegen súıikti aǵam, janashyrym. Men sizdi qatty jaqsy kórdim. Atyńyzǵa kir keltirmeımin dep júrgende tulǵa bolyp qalyptasqanymdy da baıqamaı qaldym. Sol úshin bas ıem aldyńyzda. Meniń barlyq jeke konertterimniń júrý barysyn, uıymdastyrýyn, senarıılerin áýeli osy kisi kóredi, ruqsatyn berip, bekitkennen keıin ǵana jumys bastalatyn. Syrttan maǵan jetekshilik etetin. Aıtqan sózderimdi, ótkizgen sharalarymnyń eskertýlerimen maqtaýlaryn óz áke-sheshemnen keıin osy kisimen úıindegi Jumaǵaısha jeńgemnen kútetinmin… Qısyq júrmegenim, jamanǵa ermegenim, qarqyldap kúlmegenim, qysqa kımegenim, nápsini súımeginim, bósip sóılemegenim bári sizderden kórgen ónegem men tárbıem, aǵa. Jaly bıik azamatty, jany jyly jamaǵat bolyp, shyǵaryp saldyq. Laıymda elge jasaǵan jaqsylyǵyńyz urpaǵyńyzǵa qaıtsyn. Janyńyz jánnatta bolsyn Jaqsylyq aǵa», — dep jazdy ánshi.