نارەستەلەر مەن جاسوسپىرىمدەردى ساۋدالاعان كۇدىكتى ۇستالدى

فوتو: polisia.kz

الماتى وبلىسىندا ەر ادام كامەلەتتىك جاسقا تولماعانداردى ساۋداعا سالعان, دەپ حابارلايدى Halyq Uni.

پوليتسيا قىزمەتكەرلەرىنىڭ مالىمەتىنشە, ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى كامەلەتكە تولماعانداردىڭ زاڭسىز ساۋداسىنا كۇدىكتى قىلمىستىق توپتىڭ قىزمەتىن توقتاتقان.

25 تامىزدا الەۋمەتتىك جەلىدەگى «surak.baribar» پاراقشاسىندا كامەلەتتىك جاسقا تولماعاندار مەن جاڭا تۋعان سابيلەردى زاڭدى تۇردە اسىراپ الۋعا كومەكتەسۋگە ۋادە بەرگەن قىلمىستىق توپتىڭ قىزمەتى تۋرالى جەدەل اقپارات ءتۇستى. 28 تامىزدا جەدەل-ىزدەستىرۋ ءىس-شارالارى بارىسىندا قىزىلوردا وبلىسىنىڭ تۋماسى, 38 جاستاعى كۇدىكتى انىقتالدى. كامەلەتكە تولماعانداردى ساتۋ دەرەگى بويىنشا قىلمىستىق ءىس قوزعالدى, – دەدى الماتى وبلىسى پد باستىعى باۋىرجان الەنوۆ.

كۇدىكتى قاماۋعا الىندى. قازىر بارلىق قاجەتتى تەرگەۋ شارالارى جۇرگىزىلىپ جاتىر.