Narhoz ýnıversıteti qazaq tilinde bilim berýden bas tartty

Foto: vernycapital.com

Jelide Almatydaǵy Narhoz ýnıversıtetiniń qazaq tilinde bilim berýden bas tartqany týraly aqparat tarady. Bul týraly Stan.kz aqparat agenttigi habarlaıdy.

Bul týraly jýrnalıst Dıas Nuraqyn áleýmettik jelidegi paraqshasynda jazǵan. Jýrnalıstiń aıtýynsha, oqý ornynyń eń negizgi tórt fakýltettiń qazaqsha, oryssha toptary jabylǵan.

“Almatydaǵy Narhoz ýnıversıteti qazaq tilinen bas tartypty. Oqý ordasyndaǵy eń negizgi degen tórt fakýltettiń qazaqsha, oryssha toptary jabyldy. Atap aıtqanda ekonomıka, qarjy, býhgalterlik esep, qarjylyq táýekel menedjment, bıznestegi aqparattyq tehnologııa mamandyqtary boıynsha bilim alamyn degender endi tek aǵylshynsha saıraýy kerek. Byltyr bul mamandyqtar boıynsha qazaqsha birde bir top bolmaǵan. Bıyl da “qazaqtardy” qabyldamaımyz dep sheshim qabyldapty”, – delingen jazbada.

Jýrnalıst ýnıversıtettiń bul áreketin qazaq tiline jasalǵan qastandyq dep sanaıdy.

“Bul baryp turǵan bassyzdyq. Qazaq tilin qurtýdyń tóte joly. Sebebi dúnıejúzi sóıleıtin tilde sabaq beremiz degen syltaýmen qazaq tilin tuqyrtyp otyr. NARHOZ-ǵa negizinen aýyl balalary kelip oqıdy. Aǵylshyn emes orysshany áreń túsinetin jastardyń sanasyn da tilin de qoıyrtpaqtap jatyr deýge negiz bar. Bıylǵy quryltaıda prezıdent qazaq tilin meńgergender 70 paıyzdan asty dep aıtty. Al prezıdent ákimshiliginiń basshysy Aıbek Dádebaev qazaqsha sóıleıtinder sany 81 paıyzǵa teń dep suhbat bergeni esimizde. Endeshe qazaq elinde, qazaqtyń jerinde NARHOZ-dyń qazaqsha oqytpaımyz degeni qaı sasqany? Bul qazaqtardyń quqyǵyn taptaý emeı nemene?” – deıdi jýrnalıst.

Jelide taraǵan aqparatqa qatysty ýnıversıtet basshylyǵy málimdeme jasady.

“Narhoz ýnıversıtetindegi oqý josparyna sáıkes stýdentter qazaq, orys nemese aǵylshyn tilderinde pánderdi tańdaıdy. Biz stýdentterge óz qalaýyn tańdaýyna jáne nazar aýdarýǵa múmkindik beremiz. Búgingi tańda kóptegen ýnıversıtet stýdentteri kóptegen pánderdi aǵylshyn tilinde oqýdy tańdaıdy, óıtkeni aǵylshyn tilin jaqsy meńgerý olarǵa jahandyq bilim bazasyna qol jetkizýge múmkindik beredi. Qazirgi ýaqytta álemde ǵylymı bilimniń 90%-dan astamy aǵylshyn tilinde shyǵarylady. Bul kózqaras ýnıversıtettiń tek Qazaqstanda ǵana emes, sonymen qatar shetelde de suranysqa ıe túlekterdi daıyndaýǵa baǵyttalǵan mıssııasynan kórinedi”, – delingen ýnıversıtet habarlamasynda.

Eske salsaq, buǵan deıin ǵylym mınıstri almatylyq JOO-lardy Qonaevqa kóshirý jumysy qashan bastalatynyn aıtqan edi.