جاڭالىقتار
ناريمان قۇربانوۆقا ەكى بىردەي پاتەر, كولىك: دوساەۆ وليمپيادا جۇلدەگەرلەرىن ماراپاتتادى
فوتو: الماتى اكىمدىگىنىڭ ءباسپاسوز قىزمەتى
الماتى اكىمى ەربولات دوساەۆ پاريجدە وتكەن جازعى وليمپيادا ويىندارىنان جۇلدەمەن ورالعان الماتىلىق سپورتشىلاردى ماراپاتتادى. بۇل تۋرالى qandastar.kz الماتى اكىمدىگىنىڭ ءباسپاسوز قىزمەتىنە سىلتەمە جاساپ حابارلايدى.
ەربولات دوساەۆ وليمپيادانىڭ كۇمىس جۇلدەگەرى – گيمناست ناريمان قۇربانوۆتى, قولا جۇلدەگەرلەر – دزيۋدوشى عۇسمان قىرعىزباەۆتى, بوكسشى نازىم قىزايبايدى جانە نىسانا كوزدەۋدەن سايىسقا تۇسكەن مەرگەندەر الەكساندرا لە مەن يسلام ساتباەۆتى جەتىستىكتەرىمەن قۇتتىقتادى.
«ۇلتتىق قۇراما ساپىندا ونەر كورسەتكەن الماتىلىق سپورتشىلاردىڭ قازاقستان قورجىنىنا كوپ مەدال سالعانى قۋانتادى. تالانتتارىڭىزدىڭ, تاباندىلىعىڭىزدىڭ جانە ەڭبەكقورلىعىڭىزدىڭ ارقاسىندا سىزدەر ماڭىزدى دا تاريحي جەڭىسكە قول جەتكىزىپ, حالىقتىڭ ىستىق ىقىلاسىنا يە بولدىڭىزدار, الەمدىك سپورتتىڭ دامۋىنا ۇلەس قوستىڭىزدار. سىزدەر سۇيىكتى ءىسىڭىز بەن تۋىپ-وسكەن ەلىڭىزگە دەگەن سۇيىسپەنشىلىگىڭىزدىڭ جارقىن ۇلگىسىسىزدەر», – دەدى الماتى اكىمى.
ەربولات دوساەۆ ناريمان قۇربانوۆقا ەكى بولمەلى پاتەردىڭ, ال عۇسمان قىرعىزباەۆقا, نازىم قىزايبايعا, الەكساندرا لە مەن يسلام ساتباەۆقا ءبىر بولمەلى پاتەردىڭ سەرتيفيكاتىن تابىستادى. سونىمەن قاتار, سپورتشىلارعا 5 جانە 4 ميلليون تەڭگەدەن اقشالاي سەرتيفيكاتتار جانە جاڭا اۆتوكولىكتەردىڭ كىلتى بەرىلدى. اكىمدىك بەرگەن تۇرعىن ءۇي سەرتيفيكاتىمەن بىرگە ناريمان قۇربانوۆقا دەمەۋشىلەر ەسەبىنەن تاعى ءبىر پاتەر سىيلاندى.
وليمپيادادا ەل نامىسىن قورعاعان بارلىق الماتىلىق سپورتشى مەن باپكەرلەر قۇرامى اقشالاي سەرتيفيكاتتارمەن ماراپاتتالدى. كەزدەسۋدە وليمپياداشىلار الماتىلىقتار مەن بۇكىل قازاقستان حالقىنىڭ قولداۋىن سەزىنگەنىن, جارىس كەزىندە جىگەرىن جانىپ, جەڭىسكە جەتەلەگەنىن ايتتى. سونداي-اق, ولار قالا باسشىسى ەربولات دوساەۆقا نازاردان تىس قالدىرماي, اكىمدىك تاراپىنان كوڭىل بولگەنى ءۇشىن العىس ءبىلدىردى.
ەسكە سالا كەتەيىك, 26 شىلدە مەن 11 تامىز ارالىعىندا پاريجدە وتكەن XXXIII جازعى وليمپيادا ويىندارىندا الماتىلىق سپورتشىلار 1 كۇمىس جانە 3 قولا جۇلدە, جالپى جيىنى 4 مەدال جەڭىپ الدى.
