Narıman Qurbanovqa eki birdeı páter, kólik: Dosaev Olımpıada júldegerlerin marapattady

Foto: Almaty ákimdiginiń baspasóz qyzmeti

Almaty ákimi Erbolat Dosaev Parıjde ótken jazǵy Olımpıada oıyndarynan júldemen oralǵan almatylyq sportshylardy marapattady. Bul týraly qandastar.kz Almaty ákimdiginiń baspasóz qyzmetine silteme jasap habarlaıdy.

Erbolat Dosaev Olımpıadanyń kúmis júldegeri – gımnast Narıman Qurbanovty, qola júldegerler – dzıýdoshy Ǵusman Qyrǵyzbaevty, boksshy Nazym Qyzaıbaıdy jáne nysana kózdeýden saıysqa túsken mergender Aleksandra Le men Islam Sátbaevty jetistikterimen quttyqtady.

«Ulttyq qurama sapynda óner kórsetken almatylyq sportshylardyń Qazaqstan qorjynyna kóp medal salǵany qýantady. Talanttaryńyzdyń, tabandylyǵyńyzdyń jáne eńbekqorlyǵyńyzdyń arqasynda sizder mańyzdy da tarıhı jeńiske qol jetkizip, halyqtyń ystyq yqylasyna ıe boldyńyzdar, álemdik sporttyń damýyna úles qostyńyzdar. Sizder súıikti isińiz ben týyp-ósken elińizge degen súıispenshiligińizdiń jarqyn úlgisisizder», – dedi Almaty ákimi.

Erbolat Dosaev Narıman Qurbanovqa eki bólmeli páterdiń, al Ǵusman Qyrǵyzbaevqa, Nazym Qyzaıbaıǵa, Aleksandra Le men Islam Sátbaevqa bir bólmeli páterdiń sertıfıkatyn tabystady. Sonymen qatar, sportshylarǵa 5 jáne 4 mıllıon teńgeden aqshalaı sertıfıkattar jáne jańa avtokólikterdiń kilti berildi. Ákimdik bergen turǵyn úı sertıfıkatymen birge Narıman Qurbanovqa demeýshiler esebinen taǵy bir páter syılandy.

Olımpıadada el namysyn qorǵaǵan barlyq almatylyq sportshy men bapkerler quramy aqshalaı sertıfıkattarmen marapattaldy. Kezdesýde olımpıadashylar almatylyqtar men búkil Qazaqstan halqynyń qoldaýyn sezingenin, jarys kezinde jigerin janyp, jeńiske jetelegenin aıtty. Sondaı-aq, olar qala basshysy Erbolat Dosaevqa nazardan tys qaldyrmaı, ákimdik tarapynan kóńil bólgeni úshin alǵys bildirdi.

Eske sala keteıik, 26 shilde men 11 tamyz aralyǵynda Parıjde ótken XXXIII jazǵy Olımpıada oıyndarynda almatylyq sportshylar 1 kúmis jáne 3 qola júlde, jalpy jıyny 4 medal jeńip aldy.