“ناۋقاستىڭ اعزاسىن كەسكىلەپ تاستادى”: ماڭعىستاۋلىق دارىگەر وتا ۇستىندە جاساعان ارەكەتى ءۇشىن تەرگەلۋدە

ماڭعىستاۋلىق دارىگەر وتا ۇستىندە ناۋقاستىڭ اعزاسىن كەسكىلەپ تاستاعانى ءۇشىن ايىپ تاعىلعان, دەپ حابارلايدى Qandastar.kz “ينفورمبيۋرو” جاڭالىقتار قىزمەتىنە سىلتەمە جاساپ. اۋرۋحانا اكىمشىلىگى بۇل ءىستى بەس كۇن بويى جاقىندارىنان جاسىرىپ كەلگەن.

سۇمدىق جاعداي دارىگەرلەردىڭ اۋديو جازباسىنان كەيىن عانا اشكەرە بولدى دەيدى جۇبايى. جاڭاوزەندىك قانىبەك قۇلجانوۆ ءبىر اي بۇرىن اياق استى جۇرەگى اۋىرىپ, اۋرۋحاناعا تۇسەدى. دارىگەرلەر جوسپارلى وتا جاساۋعا كىرىسەدى. بىراق سول كىرگەننەن بەس كۇن جاقىندارىن جولاتپاپتى. اراعا اپتا وتكەندە عانا جۇبايىنا دارىگەردىڭ كۇيەۋى جايىندا كۇدىكتى سۇراعى كوبەيگەن.

«اسسيسەنت ۆراچ شاقىرىپ الدى. اپا وكپەسى قارايىپ كەتكەن دەدى. نە ءۇشىن قارايعان دەدىم? ول تەمەكى شەگە ما دەپ سۇرادى? ءبىر ءتۇرلى, ءار ءتۇرلى سۇراقتار قويدى. قابىرعاسى مايىسقان سپورتقا قاتىسقان با دەپ سۇرادى? جاس كەزىندە قاتىسقان شىعار نە بولدى دەدىم”, – دەيدى مارقۇمنىڭ جۇبايى روزا دىبىسوۆا.

سويتسە, مەديتسينا ماماندارى بۇلدىرگەن ءىسىن بىلدىرمەۋ ءۇشىن بار جاعدايدى جاسىرعان ەكەن دەيدى جارى. ناۋقاسقا قاستاندىق جاسالعانىن اۋرۋحانا قىزمەتكەرىنىڭ ءبىرى جايىپ سالدى دەپ وتىر مارقۇمنىڭ ايەلى.

«اپا وسى ءساتتى جينالىستا كوتەردىك. اعاعا قاستاندىق جاسالىندى دەدى. رەانيماتولوگ ۆراچ ەكەن. نە بولدى دەگەنىمدە, ماعان, مەن جاڭا جينالىستا باستاپ ايتتىم, وسىنداي قىلمىستىق ءىس ارەكەت بولدى دەپ. ءسىز قالاي ءۇنسىز وتىرسىز دەپ. سويتسە ونىڭ اۋديو ءزاپيسى بار جينالىستىڭ”, – دەيدى ول.

وسىلايشا, روزا دىبىسوۆا باسىندا وكپەسى قارايعان دەگەنى كەسپەيتىن جەردى تىلگىلەپ تەسىپ جىبەرگەن دەيدى. سپورتپەن اينالىسا ما دەگەنى دە بەكەر ەمەس بولىپ شىقتى. قابىرعاسىن كۇشتەپ قيسايتقانىنا سەنىمدى. ال, كەلىنشەكتىڭ قولىنا تيگەن قۇپيا اۋديو جازبا ءتىپتى شوشىتادى.

«نەگىزى قاساقانا ادام ءولتىرۋ ماقساتىندا. ىشىندە ۆراچتاردىڭ ايتقان ءسوزى بار. كوپ بولسا ماڭعىستاۋدىڭ ءبىر ادامى ولەدى. نەسىنە قينالاسىڭ دەگەن ءسوزى بار. مەن ونى وتىرىك شىعارىپ تۇرعان جوقپىن. بىزدە اۋديو زاپيس بار. سوندا بار ءومىرىمىزدى, اللادان كەيىن دارىگەرگە تابىستايمىز. وعان مۇنداي قاستاندىققا قانداي كىم قۇقىق بەردى”, – دەيدى روزا دىبىسوۆا.

كارديوحيرۋرگتىڭ مۇنداي جاعدايعا نە ءۇشىن بارعانىن دەنساۋلىق ساقتاۋ باسقارماسى ايتا المادى. پوليتسيا ايەلدىڭ ارىزىنان كەيىن قىلمىستىق ءىس قوزعاعان.

«مەديتسينالىق كومەكتى ءتيىستى دەڭگەيدە كورسەتپەگەنى بويىنشا قر قك 317 بابى, 2-ءشى بولىگى ابايسىزدا دەنساۋلىققا اۋىر زيان كەلتىرۋ بويىنشا دارىگەرگە قاتىستى قىلمىستىق ءىس قوزعالدى. كىنالى ادامدار زاڭدا بەلگىلەنگەن تارتىپپەن جاۋاپكەرشىلىككە تارتىلاتىن بولادى”, – دەپ مالىمدەدى ماڭعىستاۋ وبلىسى پوليتسيا دەپارتامەنتى اقپاراتتىق ساياسات ءبولىمىنىڭ باستىعى ايگەرىم يباتۋللاەۆا.

قازىر 56 جاستاعى ناۋقاس جانساقتاۋ بولىمىندە جاتىر. جاعدايى ءالى اۋىر. ال تۋىستارى گيپوكرات انتىنا وسىنداي وپاسىزدىق جاساعان ماماندى قاساقانا ادام ءولتىرۋ بابى بويىنشا تەرگەلۋىن تالاپ ەتەدى.