Nauryz Almaty Vibe: robottar merekeniń juldyzyna aınaldy

Foto: ashyq derekkóz

Robot-gýmanoıdtar almatylyqtar men qala qonaqtaryn Naýryz meıramymen quttyqtap júr, dep jazdy qandastar.kz

Almatyda Panfılov jaıaý júrginshiler kóshesinde, Qabanbaı batyr kóshesinen bastap Tóle bı kóshesine deıingi alańda, gýmanoıdty robottardy kezdestirýge bolady. Olar qala turǵyndary men qonaqtaryn Naýryz meıramymen quttyqtap, merekelik kóńil-kúı syılap júr. Dástúrli taqııa men shapan kıgen robottar kóshede erkin serýendep, balalardyń ǵana emes, eresekterdiń de qyzyǵýshylyǵyn týdyrdy.

Qala turǵyndary gýmanoıdtarmen estelik sýretke túsip, bılep, qol alysyp amandasyp, olardy vıdeoǵa túsirip jatyr.

Sonymen qatar, Panfılov kóshesinde eski plastık zattardan jasalǵan staıonarlyq robottar da qoıylǵan. Olar da ózine erekshe nazar aýdaryp, kórermenderdiń qyzyǵýshylyǵyn týdyrdy.

Budan bólek, merekelik alańda daıashy-robottar, robot-aspaz jáne barısta-robot jumys isteýde. Olar baýyrsaq daıyndap, qonaqtarǵa kofe usynyp, tapsyrystardy jetkizýde. Qala turǵyndary men týrıster olardyń qyzmetin qýana paıdalanyp jatyr.

Panfılov kóshesiniń ortasyna jaryqdıodty ekrandarmen jabdyqtalǵan kınetıkalyq týnnel ornatyldy. Bul art-nysan jarqyn reńkti oıý-órnekter arqyly ótip bara jatqan adamdardyń qımyldaryn qaıtalaıdy, bul nysan foto men beınetúsirilimder úshin erekshe fonǵa aınaldy.

Merekelik alańda sadaq atyp, vırtýaldy formatta mergendik qabiletti synaýǵa múmkindik bar. Sondaı-aq, VR-garnıtýra arqyly ótken ǵasyrlarǵa saıahat jasaýǵa bolady. Jasandy ıntellekt tehnologııasyn qoldana otyryp, ulttyq naqyshta óńdelgen fotosýretke túsip, ony birden telefonǵa júkteýge bolady.

Zııatkerlik oıyndardy unatatyndar «Oı-Dýman» shoýyna qatysyp, robototehnıka kórmesin tamashalaı alady.

Aıta keterligi, bul alańda vırtýaldy avatar – Ǵalymjan da bar. Ol Naýryz meıramyn atap ótip júrgen almatylyqtardyń suraqtaryna jaýap berip, is-sharalar baǵdarlamasy týraly aqparat usynyp, halyqpen áńgimelesip, quttyqtaý tilegin jaýdyrýda.

Osy Nauryz Almaty Vibe festıvali arqyly Panfılov kóshesi jańa tehnologııalar men dástúrlerdiń ádemi úılesken erekshe ortalyǵyna aınaldy. Bul festıval 21-22 naýryzda saǵat 10:00-den bastap 22:00-ge deıin jalǵasady. Kelip, robottarmen júzdesýge asyǵyńyzdar. Bılet alýdyń qajeti joq, barlyǵy tegin.

Sonymen qatar, jaıaý júrginshiler kóshesinde sahna ornatylyp, onda laıv-bendter men dıdjeıler óner kórsetip, qala turǵyndary men qonaqtaryna erekshe merekelik atmosfera syılaýda.