جاڭالىقتار
ناۋرىزدان باستاپ كەيبىر سمارتفوندار «قارا تىزىمگە» ەنۋى مۇمكىن
فوتو: اشىق دەرەككوز
24 ناۋرىزدان باستاپ ابونەنتتىك ۇيالى بايلانىس قۇرىلعىلارىن تىركەۋ ەرەجەلەرىنە ەنگىزىلگەن وزگەرىستەر كۇشىنە ەنەدى. جاڭا ەرەجەلەر قازاقستان اۋماعىنا جاڭادان اكەلىنگەن سمارتفوندارعا عانا قاتىستى بولماق, دەپ جازدى qandastar.kz
ەل اۋماعىندا بۇرىننان بار جانە يدەنتيفيكاتسيالىق كودتار دەرەكقورىنا ەنگىزىلگەن تەلەفوندار اۆتوماتتى تۇردە «اق تىزىمگە» ەنەدى ءارى ەشقانداي شەكتەۋسىز جۇمىسىن جالعاستىرا بەرەدى.
«بۇل جاڭاشىلدىقتار تىركەۋ جۇيەسىن ودان ءارى جاقسارتىپ, الاياقتىقپەن كۇرەسۋگە, تۇتىنۋشىلاردىڭ قۇقىقتارىن قورعاۋعا جانە ءموبيلدى قۇرىلعىلاردى پايدالانۋ قاۋىپسىزدىگىن ارتتىرۋعا باعىتتالعان. قازاقستاندا شامامەن 3,7 ميلليون قايتالانعان IMEI-كودى بار قۇرىلعىلار تىركەلگەن», — دەپ حابارلادى تسيفرلىق دامۋ مينيسترلىگى.
ۆەريفيكاتسيا ناتيجەسىندە سمارتفوندار ءۇش ساناتقا بولىنەدى:
اق ءتىزىم – ءساتتى ۆەريفيكاتسيادان وتكەن قۇرىلعىلار, ولار ەشقانداي شەكتەۋسىز تىركەلەدى.
سۇر ءتىزىم – ۋاقىتشا رۇقسات ەتىلگەن قۇرىلعىلار. ولاردىڭ يەلەرى 30 كۇن ىشىندە قۇرىلعىنىڭ زاڭدى تۇردە اكەلىنگەنىن راستاۋى ءتيىس.
قارا ءتىزىم – زاڭسىز اكەلىنگەن, جالعان نەمەسە ۇرلانعان قۇرىلعىلار. ولار بۇعاتتالادى.
