ناۋرىزناما: بۇگىن – ۇلتتىق كيىم كۇنى

فوتو: اشىق دەرەككوز

قازىرگى مودەرنيزاتسيا داۋىرىندە ۇلتتىق كيىم ءوز ءمانىن جويماي, بۇرىنعى داستۇرلەر مەن زاماناۋي ۇردىستەردى ۇيلەستىرە وتىرىپ, جاڭا ينتەرپرەتاتسياعا يە بولدى. ۇلتتىق ستيل ۇلتتىق مىنەز پەن ۇلت بىرلىگىن ايشىقتاي وتىرىپ, ەل مادەنيەتى مەن تاريحىنىڭ اجىراماس بولىگىنە اينالدى, دەپ جازادى Qandastar.kz

ناۋرىزنامانىڭ بۇل كۇنى — «ۇلتتىق كيىم كۇنى» دەپ اتالدى. ۇلتىمىزدىڭ ۇلىلىعىن ايشىقتايتىن ۇلتتىق كيىم ارقاشان ءوز قۇندىلىعىن جوعالتقان ەمەس. قازاقى ويۋ مەن اشەكەيلەر, ساۋكەلە مەن كيمەشەك, شاپان مەن كەڭ ەتەكتى كويلەك ۇلتتىق بولمىسىمىزدى ەرەكشەلەپ تۇراتىنى انىق. بۇل كۇندى ۇلتتىق كيىم كۇنى دەپ اتاۋى بەكەر ەمەس. ويتكەنى, ءدال وسى كۇنى ۇلتتىق كيىمدەر مەن ءساندى بۇيىمدار كورسەتىلىمى حالىق نازارىنا ۇسىنىلىپ, بارلىعى ءبىر كۇندە ۇلتتىق كيىم كيەدى.

وسى كۇنى قالا جانە بارلىق جەردە ءتۇرلى فورماتتاعى ءىس-شارالار ۇيىمداستىرىلادى.

سان عاسىرلار بويى قازاقتىڭ ۇلتتىق كيىمى قاراپايىمدىلىعىمەن جانە ۇتىمدىلىعىمەن ەرەكشەلەنەدى. ۇلتتىق كيىم ۇلگىسىندە پايدالانىلاتىن بىلعارى, ءجۇن, كيىز, ماتا سياقتى تابيعي ماتەريالدار, اسىل تاستار مەن مەتالدار ادامعا جىلۋلىق پەن جايلىلىق سىيلاۋمەن قاتار, كيىم يەسىنىڭ اتاق-دارەجەسىن, بايلىعىن كورسەتەتىن.

بۇل ايتۋلى كۇنى ءبىز ءاربىر قازاقستاندىقتى ءوز مادەنيەتى مەن ۇلتتىق بىرەگەيلىگىن ماقتان تۇتۋعا, اتا-بابالارىمىزعا قۇرمەت كورسەتۋگە جانە وزىق داستۇرلەرىمىزدى قازىرگى زامانعا جالعاۋعا شاقىرامىز.