«نازارباەۆ مەنىڭ جوبامدى كەرەك قىلمادى» – قاجىگەلدين

Ulysmedia كوللاجى

مەملەكەت قايراتكەرى, قوعام بەلسەندىسى ارى قازاقستاننىڭ بۇرىنعى پرەمەر-ءمينيسترى اكەجان قاجىگەلدين كەزىندە نازارباەۆ ونىڭ بالقاشتا ەلەكتر ستانتسياسىن سالۋ تۋرالى جوباسىن كەرەك قىلماعانىن ايتتى, دەپ حابارلايدى Ulysmedia.kz.

 Ulysmedia.kz-كە بەرگەن سۇحباتىندا قاجىگەلدين بىرنەشە دەپۋتات جانە جۇرەگىنىڭ تۇگى بار ءمينيستردىڭ باسىن قوسىپ, زۋم ارقىلى الەۋمەتتىك ماسەلەلەردى تالقىلاۋدى ۇسىندى.

– ءبىز مىناداي ءبىر ارەكەت جاساساق: ءسىز وسى ستۋديا ارقىلى, زۋم ارقىلى 5-6 دەپۋتات, بۇگىنگى ءماجىلىستىڭ دەپۋتاتتارى, جۇرەگى بار مينيستر بولسا, ساراپشىلار بار, ءبارىمىز باسىمىزدى قوسىپ, تالقىلايىق. الەۋمەتتىك جاعداي شىنىندا قانداي, قولىمىزدان نە كەلەدى, سول زۋمدا 5 پۋنكتتەن تۇراتىن باعدارلاما بەرەيىن, دەدى ول.

سونداي-اق قاجىگەلدين وزەكتى ماسەلەنى تالقىلاپ, ونى شەشۋ جولدارىن نە ءۇشىن زۋم ارقىلى تالقىلاۋ كەرەك ەكەنىن دە ناقتىلاي ءتۇستى.

– اقىلىمىزدى جەكە ايتاتىن بولساق ونى نە باسقاشا قولدانادى نەمەسە ۇستەلدىڭ استىنا تىعىپ تاستايدى, قولدانبايدى. مەن سىزگە ايتايىن 2009 جىلى مەن بۇرىنعى پرەزيدەنت نازارباەۆتىڭ قولىنا ۇستاتىپ ءبىر پروەكت جىبەردىم. بالقاشتا 1 ملرد كۆ وندىرەتىن ۇلكەن ەلەكتروستانتسيا سالۋ تۋرالى. ونىڭ باعاسى 1 ملرد 100 ملن ەۋرو ەدى. «كەرەگى جوق» دەدى, – دەيدى ەكس-پرەمەر قاجىگەلدين.

ەسكە سالا كەتسەك, 1 قاڭتار كۇنى اكەجان قاجىگەلدين Ulysmediaعا كەڭ كولەمدى سۇحبات بەرىپ, وقىرمانعا قازاقستاننىڭ كەلەشەگى, توقاەۆتىڭ بيلىگى, نازارباەۆ پەن قاشاعان داۋى جايلى پىكىرىن جەتكىزدى.