Nazarbaev pen Qulybaev “Astana Opera” qamqorshylyq keńesinen nege shyǵaryldy?

Foto:gov.kz

Qazaqstannyń Mádenıet jáne aqparat mınıstrligi “Astana Opera” teatrynyń qamqorshylyq keńesiniń quramyn ne úshin ózgertý týraly sheshim qabyldaǵanyn túsindirdi, dep habarlaıdy qandastar.kz Informburo.kz saıtyna siltep. 

14 naýryzda “Ashyq NQA” portalynda jarııalanǵan qaýly jobasyna sáıkes, qamqorshylyq keńesten Darıǵa Nazarbaeva, Tımýr Qulybaev, Keńes Raqyshev, Nurlan Smaǵulov, Almasadam Sátqalıev, Aleksandr Mashkevıch (ol kezde kásipker tiri bolǵan) jáne Patoh Shodıevti shyǵarý usynyldy. Olardyń ornyna Baharıdın Ablazımov, Raıymbek Batalov, Nurlan Jaqypov, Shýhrat Ibragımov jáne Seger Haıtıng kirýi múmkin.

Mádenıet jáne aqparat mınıstrligi Informburo.kz saıtynyń resmı saýalyna bergen jaýabynda teatrdyń qamqorshylyq keńesi keńesshi organ ekenin jáne onyń sheshimderi usynys retinde qarastyrylatynyn aıtty.

“Keńestiń basty mindeti – teatrdyń qalyptasýy men damýyna qoldaý kórsetý: bıýdjetten tys qarjy kózderin tartý, shyǵarmashylyq josparlardy júzege asyrýǵa kómektesý, kásibı sheberlikti arttyrý úshin jaǵdaı jasaý, halyqaralyq jobalardy iske asyrýǵa járdemdesý, qyzmetkerlerge áleýmettik qoldaý kórsetý jáne basqarý júıesin jetildirýge yqpal etý”, – dep túsindirdi mınıstrlik.

Aıta keteıik, “Astana Opera” basshylyǵynda da ózgerister boldy. 11 naýryzda teatrdyń jańa dırektory bolyp Aleksandr Sovostıanov taǵaıyndaldy. Mınıstrlik kadrlyq ózgeristerdiń áli de jalǵasýy múmkin ekenin joqqa shyǵarmaıdy. Sondaı-aq, teatrdyń qarjylyq turaqtylyǵyn saqtaý úshin bılet baǵasyna túzetýler engizilýi múmkin.