ءبىلىم
نازارباەۆ زياتكەرلىك مەكتەپتەرىندە بالالاردى اقىلى وقۋعا قابىلداۋ ەرەجەسى وزگەردى
فوتو: اشىق دەرەككوز
نازارباەۆ زياتكەرلىك مەكتەپتەرىندە بالالاردى اقىلى وقۋعا قابىلداۋ ەرەجەسى وزگەردى, دەپ جازدى qandastar.kz
جوعارى اۋديتورلىق پالاتا 2024 جىلعى شىلدەدە «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنا مەملەكەتتىك اۋديت جۇرگىزگەن بولاتىن. ناتيجەسىندە قارجى-شارۋاشىلىق جانە ۇيىمداستىرۋشىلىق ماسەلەلەرگە قاتىستى كەمشىلىكتەر انىقتالدى.
اۋديتورلاردىڭ تەكسەرىسىنەن كەيىن بۇزۋشىلىقتاردى جويۋ بويىنشا بىرقاتار شارا قابىلدادى. اتاپ ايتقاندا:
تاۋارلاردى, جۇمىستار مەن كورسەتىلەتىن قىزمەتتەردى ساتىپ الۋ قاعيدالارىنا وزگەرىستەر ەنگىزىلدى. ساتىپ الۋ شارتتارى مەن ولاردىڭ ورىندالۋى جونىندەگى قۇجاتتار ساتىپ الۋدىڭ رەسمي ۆەب-پورتالىنا ورنالاستىرىلماق. تىكەلەي شارت جاساسۋ ارقىلى كىتاپتار مەن كوركەم ادەبيەتتەردى ساتىپ الۋ ءتاسىلى تولىعىمەن الىپ تاستالدى; 
قىزمەتكەرلەردىڭ شتات سانىن ەسەپتەۋ ءنورماتيۆى ازىرلەنىپ, بەكىتىلدى; شەتەلدىك پەداگوگتەردىڭ قىزمەتىن باعالاۋ ولشەمشارتتارى بەكىتىلدى;
فيليالدارعا شەتەلدىك مۇعالىمدەردى تارتۋ شىعىندارىنىڭ ەسەبى جاڭارتىلدى. اتاپ ايتقاندا, ءبىر شەتەلدىك پەداگوگكە تۇرعىن ءۇيدى جالعا الۋ الاڭىنىڭ نورمالارى بەلگىلەندى, بولمە سانى كورسەتىلۋى ءتيىس;
اقىلى نەگىزدە وقۋعا قابىلداۋ قاعيدالارىنا وزگەرىستەر ەنگىزىلدى. ەندى وقۋشىلاردى وقۋعا قابىلداۋ الدىندا ولاردىڭ ءبىلىمىن باعالاۋدىڭ مىندەتتى ءراسىمى قوسىلدى.
