“Nazarbaevtyń ekinshi áıeli” ShQO-da bıznestiń qandaı áleýmettik mindettemesin oryndap otyr?

Foto: KazTag

Búgin «Shyǵys Qazaqstan oblysynyń áleýmettik-ekonomıkalyq damýy týraly» taqyrybynda kóshpeli baspasóz máslıhaty ótti. Shyǵys Qazaqstan oblysynyń ákimi Ermek Kósherbaev Kznews.kz tilshisiniń «О́ńirdegi iri taý-ken kásiporyndary qandaı áleýmettik mindettemelerdi oryndap otyr?» degen saýalyna “Barys” qorynyń atqarylǵan jumystaryn jikteı otyra jaýap berdi, dep jazdy qandastar.kz.

«Bizde «Barys» qoǵamdyq qory bar. Bul qorǵa oblys ákimdigi iri ónerkásiptik óndiris oryndarymen jasasqan memorandýmǵa sáıkes aqsha aýdarylady. Qorda qor basqarmasynyń óziniń praktıkalyq keńesi bar, bul qoǵamdyq qor, ol shyǵyndardy qaı baǵytta, ne úshin, birinshi kezekte ne jumsaý kerektigin anyqtaıdy», – dep jaýap berdi Ermek Kósherbaev.

«Barys» qorynyń ıesi Azattyq radıosynyń tergeýine jáne beıresmı derekterge qaraǵanda, Nazarbaevtyń ekinshi áıeli Gúlnar Raqysheva bolyp shyqty. Bastapqyda qordyń quryltaıshysy Rýslan Radmıruly Raqyshev boldy. Tegine qarasaq, bul Gúlnardyń aǵasy Radmır Raqyshevtyń uly. Sondaı-aq Shyǵys Qazaqstan oblysynda ornalasqan «Buqtyrma ement» kompanııasynyń dırektorlar keńesiniń múshesi boldy.

О́tken jyly «Azattyq» radıosy áleýmettik jelilerge sholý jasap, Raqyshevanyń qazir Qazaqstanda turatynyn jáne birneshe kásiptiń ıesi ekenin atap ótti. Gúlnar Orazqyzy – Almaty qalasy, Tóle bı kóshesi, 40 úı mekenjaıynda tirkelgen «Fırma Sharm» seriktestiginiń ıesi. Onyń ózi kompanııanyń dırektory retinde kórsetilgen.

1998 jyly qurylǵan kompanııa jyljymaıtyn múlikti jalǵa berý jáne shashtaraz qyzmetteri salasynda jumys isteıdi. Statsnet derekter bazasyna sáıkes, «Fırma Sharmnyń» jyldyq aınalymy shamamen 100 mıllıon teńgeni quraıdy. Gúlnar Raqysheva – taǵy bir tabysty kompanııa Sergio Group negizin qalaýshylardyń biri. Kompanııanyń jyldyq tabysy tórt-alty mıllıard teńgeni quraıdy. Statsnet málimetinshe, bıylǵy jyly jyldyq qarjy aınalymy 12 mıllıard teńgeden asty. Seriktestiktiń astanalyq fılıalynyń kirisi de qomaqty.

“Enshilerge” qarap, Nazarbaevtyń “ekinshi áıeli” qandaı mindettemelerdi oryndaıdy degen saýal týyndaıdy…