«نە ءتۇرىمدى, نە ءۇنىمدى تاپپاي قالساڭىزدار, سەبەبى بەلگىلى»: اقبوتا كەرىمبەكوۆا داۋلى ماسەلەگە نۇكتە قويدى

فوتو: اشىق دەرەككوز

ۇلتتىق ارنادا بولاتىن مۋزىكالىق جوبالارداعى ماسەلەنى كوتەرگەن اقبوتا كەرىمبەكوۆا ۇندەۋىنە قاتىستى قورىتىندى جاسادى. بۇل تۋرالى qandastar.kz Kznews.kz اقپارات اگەنتتىگى حابارلايدى.

ايتا كەتەيىك, مادەنيەت قايراتكەرى ۇلتتىق ارنا باسشىلىعىنا ۇندەۋ جاساعان ەدى.

«جەكسەنبى كەشىندەگى «جەكپە-جەككە» دە, مىنە, بۇگىن 3 كۇن, 3 ءتۇن ءوتىپتى. ۇلتتىق ارنا ارنايى مالىمدەمە جاسادى. ديناراجان اراعا پالەن ادام سالىپ, شايعا شاقىرىپ, تىڭداۋىمدى, ءتۇسىنىسۋىمدى سۇرادى. مەن «بۇگىن بالاعاتتاعان اداممەن ەرتەسى دىم بولماعانداي شاي ءىشىپ وتىرا المايدى ەكەنمىن, ءبىز حالىق اراسىندا جۇرگەنىمىزبەن, نامىسقويمىز!» دەپ جاۋاپ بەردىم. ونىمدى دۇرىس دەپ ەسەپتەيمىن. باسقارما ءتورايىمى لاززات تانىسباي دا ارنايى كەزدەسۋگە شاقىرعان ەكەن. وقيعاعا تىكەلەي قاتىسى بولماسا دا, ۇلتقا ورتاق ارنانىڭ تىزگىنىن ۇستاپ وتىرعاننان كەيىن, ماسەلەدە ۇلت ارناسىنىڭ اتى اتالعاننان كەيىن بەي-جاي قاراي الماعانى عوي, امان بولسىن!», – دەپ جازدى ءانشى.

سونداي-اق قولداۋ بىلدىرگەن بارشا وقىرمان قاۋىمعا العىس ءبىلدىردى.

«جالپى, مەنىڭ ۇندەۋىمە, ونىڭ اينالاسىنداعى مەن جاريالاعان جازبالارعا 20 مىڭعا جۋىق ادامنىڭ رەاكتسياسى ءبىلدىرىلىپ, 5 مىڭعا جۋىق ادامنىڭ پىكىرى توپتاسىپتى. ءوز stories-تەرىنە بولىسكەندەردىڭ دە سانى 1000-داپ سانالادى. بۇل دەگەنىمىز كوپتىڭ كوكەيىندە جۇرگەن تەلەارنا ماسەلەسىنە قوعامدىق وي قوزعالعانىن بىلدىرەدى. دەي تۇرعانمەن, ناقتى شەشىم, سان-ساققا جۇگىرگەن ويعا توقتام بولاتىن ناتيجە كورمەدىم. اركىم ءوز تۇسىنگەنىمەن وي قورىتىپ جاتىر. بولاشاقتا مەنى مەملەكەتتىك ارنالاردان كورە الماي قالساڭىزدار, نە ءۇنىمدى, نە ءتۇرىمدى تەلەارنا-راديولاردان تاپپاي قالساڭىزدار, ونىڭ نەنىڭ سەبەبىنەن ەكەنىن ىشتەي ۇعا بەرەسىزدەر عوي!», – دەدى ونەر يەسى.

ەسكە سالايىق, اقبوتا كەرىمبەكوۆا ۇلىنا قىسىم كورسەتىلىپ جاتقانىن ايتقان ەدى.