جاڭالىقتار
«نەگە قايتا-قايتا قازاقشا سۇراق قويا بەرەسىڭ?»: رەسەيلىك باپكەر قازاق جۋرناليسىنە ۇرىسىپ تاستادى
فوتو: رفس
بۇگىن فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆ استانادا العاش رەت ءباسپاسوز ءماجىلىسىن وتكىزدى. جيىن بارىسىندا جۋرناليست نۇرسۇلتان قۇرماننىڭ قايتا-قايتا قازاقشا سۇراق قويعانى رەسەيلىك مامانعا ۇناماي قالدى, دەپ حابارلايدى Qaz365.kz.
نۇرسۇلتان قۇرمان باستاپقىدا قازاقشا قويعان سۇراعىن قفف پرەزيدەنتى ادىلەت بارمەنقۇلوۆ ورىسشاعا اۋدارىپ بەرگەن. ال كەزەكتى رەت قازاقشا ساۋال تاستاعاندا ستانيسلاۆ چەرچەسوۆ رەنىشىن ايتتى.
«نەگە ورىسشا قويمايسىز? مەن قازىر سىزگە ءوز انا ءتىلىم وسەتين تىلىندە جاۋاپ بەرسەم نە بولادى? بىراق ول كەزدە ەشكىم تۇسىنبەيدى. وسىنىڭ الدىندا قازاقشا ساۋالىڭىزدى فەدەراتسيا پرەزيدەنتى اۋدارىپ بەردى, ەندى ول كىسىنى قايتا-قايتا اۋرەلەمەيمىن عوي. ءوتىنىش جاساۋ ءبىرىنشى رەت تەگىن بولادى, ال كەيىننەن ونداي جۇرمەيدى», – دەدى رەسەيلىك باپكەر.
ايتا كەتەيىك, ستانيسلاۆ چەرچەسوۆ بۇعان دەيىن ۆەنگريا, پولشا چەمپيوناتتارىندا كلۋبتاردى جاتتىقتىرعان. رەسەي قۇراماسىنىڭ دا تىزگىنىن ۇستاعان. بىلتىردان بەرى جۇمىسسىز جۇرگەن ەدى. جاقىندا قازاقستان ۇلتتىق قۇراماسىنىڭ باس باپكەرى ماگومەد اديەۆتى الماستىردى.
