«نەسيە العىزىپ, سودان كەيىن ءولتىرىپ تاستاعان»: 18 جاستاعى بويجەتكەندى ولتىرگەندەرگە ۇكىم شىقتى

فوتو: nemolchikz_official

6 ناۋرىز كۇنى كۇدىكتى ەكى جىگىت ورتاق تانىستارى ارقىلى جابىرلەنۋشى قىزبەن تانىسقان. ورتاق تانىستارى ولاردان قىزعا تۇراتىن جەر تاۋىپ بەرۋدى سۇراعان. ولار الماتىدا پاتەر جالداعان, دەپ حابارلايدى qandastar.kz  Skifnews.kz اقپارات پورتالىنا سىلتەمە جاساپ. 

ءبىر كۇن بىرگە تۇرعاننان كەيىن, كەلەسى كۇنى جالعا العان پاتەردىڭ اقىسىن تولەيتىن اقشالارى تاۋسىلعان. سوتتالۋشى ك جابىرلەنۋشىنى «iPhone13 Pro» تەلەفونىن كوميسسيالىق دۇكەنگە وتكىزۋگە كوندىرگەن. تەلەفوندى كەيىن قايتا الىپ بەرۋگە ۋادە بەرگەن.

العان اقشا تەز تاۋسىلعان سوڭ كۇدىكتى جىگىتتەر مارقۇم قىزدى 435 مىڭ تەڭگە نەسيە الۋعا كوندىرگەن. 12 ناۋرىزدا ولار تەلەفوندى قايتا ساتىپ الىپ, 240 مىڭ تەڭگەگە ساتىپ جىبەرگەن. بىراق بۇل تۋرالى مارقۇمعا ايتپاعان.

مارقۇم بىرنەشە رەت تەلەفونىن قايتارۋدى سۇراعان. بىراق جىگىتتەر تەلەفوندى قايتارماس ءۇشىن, نەسيەسىن تولەمەس ءۇشىن, قىزدان قۇتىلۋدى ءجون كورگەن.

«15 ناۋرىز كۇنى تۇندە سوتتالۋشىلار جابىرلەنۋشىنى ۇيىنە اپارامىز دەپ, ءبارى بىرگە جولعا شىققان. تۇنگى ساعات 02:00 شاماسىندا قوناەۆ – قازاقستان اۆتوجولىنىڭ 36-شى شاقىرىمىنا جەتكەندە دالاعا بۇرىلعان. سوتتالۋشىلار كەزەكپەن-كەزەك مارقۇمدى تاياقپەن ۇرىپ, بەنزين قۇيىپ, ورتەپ جىبەرمەك بولعان. سودان كەيىن وقيعا ورنىنان كەتىپ قالعان», – دەدى سوت وتىرىسىندا.

18 جاستاعى ستۋدەنت العان جاراقاتتان سول جەردە جان ءتاسىلىم ەتكەن.

سوت ەكى جىگىتتى 17 جىلعا باس بوستاندىعىنان ايىردى.

ۇكىم زاڭدى كۇشىنە ەندى.