نەسيە الۋدان ەرىكتى تۇردە باس تارتۋعا بولادى

وتكەن جىلى ەلىمىزدە 20 مىڭنان اسا قارجىلىق الاياقتىق دەرەگى تىركەلگەن. ولار اڭقاۋلاردى الداپ, قۇرىعىنا ءتۇسىرۋ ءۇشىن IT تەحنولوگيانىڭ زاماناۋي ادىستەرىن قولدانعان. تانىمال بانكتەر مەن قارجى ۇيىمدارىنىڭ اتىن جامىلعاندارعا اسىرەسە ەگدە جاستاعىلار تەز سەنىپ قالادى. وعان قارسى تۇرۋ ءۇشىن ە-gov سايتىندا نەمەسە ە-gov mobile قوسىمشاسىنداعى نەسيەدەن ەرىكتى تۇردە باس تارتۋ قىزمەتىنە جۇگىنگەن ءجون. بۇل تۋرالى ەلىمىزدىڭ قارجى نارىعىن رەتتەۋ جانە دامىتۋ اگەنتتىگىنىڭ ماماندارى حابارلادى. قازىر بۇل قىزمەت ءتۇرى حالىقتىڭ بارىنە بىردەي قولجەتىمدى. شەكتەۋدى التى اي مەرزىمگە قويۋعا بولادى. بۇل جارتى جىل نەسيە الا المايسىز دەگەندى بىلدىرمەيدى. ونى كەز كەلگەن ۋاقىتتا الىپ تاستاۋعا مۇمكىندىك بار. قازىر شەكتەۋ ۋاقىتىن ۇزارتۋ جولدارى قاراستىرىلىپ جاتىر. وعان قوسا, الاياقتىق وپەراتسيالار بويىنشا دەرەكتەر جينايتىن انتيفرود ورتالىعىنىڭ بىرىڭعاي بازاسىن قۇرۋ جوسپارلانعان. مۇحاممەد باعدات ۇلى, قر قارجى نارىعىن رەتتەۋ جانە دامىتۋ اگەنتتىگىنىڭ باس مامانى: — ياعني ءسىز ەرىكتى تۇردە ستوپ كرەديتكە قول قوياتىن بولساڭىز. وندا ەشقانداي اقپارات ونىڭ ىشىندە كرەديتتىك تاريح تۋرالى اقپارات تولىعىمەن ەشقاي جەرگە بەرىلمەيدى. ياعني ول قورعاۋلى بولادى. ميكروقارجىلىق مەكەمەلەر بولسىن, 2 دەڭگەيلى بانكتەر بولسىن ءسىزدىڭ قارجىلىق اقپاراتىڭىزدى بىلە المايدى. سەبەبى ول زاڭدى تۇردە مەملەكەت تاراپىنان قورعالادى.